कपिलवस्तुको कृष्णनगर भन्सार कार्यालयका दुई जना कर्मचारी कारबाहीमा परेका छन्। अघिल्लो शनिबार फलफूल तथा तरकारी बोकेका १५ बढी गाडीलाई विषादी जाँचको नक्कली कागजात बनाएर भन्सार पास गराएपछि उनीहरु कारबाहीमा परेका हुन्।
भन्सारमा कार्यरत कर्मचारीले व्यवसायीसँग मिलेर भारतबाट ल्याइएका फलफूल तथा तरकारीमा विषादी जाँचको नक्कली कागजात बनाएका थिए।
भन्सार कार्यालयका सूचना अधिकृत बासु नेपालले तरकारी तथा फलफूल जाँचको जिम्मेवारीमा रहेर काम गर्दै आएका नासु प्रेम पौडेल र कमल नेपालीलाई कारबाही गरिएको जानकारी दिए।
व्यवसायीसँगको मिलेमतोमा नक्कली कागजात बनाएका दुवै जनालाई जिम्मेवारीबाट मुक्त गरेर अनुसन्धान र कारबाहीको प्रक्रिया अगाडि बढाइएको नेपालले जानकारी दिए। गएको शनिबार विषादी जाँच गर्ने प्रयोगशाला र प्लान्ट क्वारेन्टिन बन्द भएकाले सरकारले मुलुकका सबै नाकाबाट तरकारी तथा फलफूल भन्सार पास गर्न रोक लगाएको थियाे।
तर, कृष्णनगर भन्सार नाकाबाट भने भन्सार, विषादी परीक्षण प्रयोगशाला, क्वारेन्टिनका कर्मचारी, भन्सार एजेन्ट र व्यवसायीको मिलेमतोमा अघिल्लो दिनको स्वस्थकर प्रमाणपत्र (नक्कली कागजात) बनाई तरकारी तथा फलफूल (कृषिउपज) भारतबाट आयात भएकाे थियाे।
दुईजना कर्मचारीले मात्र १५ वटा गाडी भन्सार पास गराएको भन्नेमा स्थानीय व्यवसायीले भने पत्याउन सकेका छैनन्।
भारतबाट ल्याइएका तरकारी तथा फलफूलको गाडीलाई भन्सारमै राखी त्यसको नमूना बुटवलस्थित विषादी अवशेष द्रुत विश्लेषण प्रयोगशालामा परीक्षण गरेपछि मात्र विषादी जाँचको रिपोर्टका आधारमा गाडीलाई भन्सार गरेर पठाइन्छ।
-1746009348.jpg)
