सोमबार साँझ सवा ६ बजे ईलाका प्रहरी कार्यालय गैंडाकोट, पूर्वी नवलपरासीमा खबर पुग्यो- नारायणी नदीमा एक युवतीले हाम फालिन्।
खबर पाउनेबित्तिकै प्रहरी कार्यालय नारायणगढको टोली घटनास्थल पुग्यो। तर हाम फालेकी महिला भने फेला परिनन्। प्रहरी टोलीले केहीबेर खोजी गर्यो। रात छिप्पिँदै गएपछि खोज्न गाह्रो भयो र पानीको बहाव पनि उच्च भएपछि टोली फर्कियो।
मंगलबार बिहान साढे ६ बजे चितवन प्रहरी कार्यालयमा फोन आयो।
'भरतपुर महानगरपालिका-४ रामघाट नजिक नारायणी नदीको टापुमा कसैले हात हल्लाउँदै छ। उद्धार गर्न मद्धत माग्दै छन्,' फोनबाट कसैले सूचना दियो।
बिहान मर्निङ वाकमा गएका मान्छेले खबर गरेका रहेछन्।
चितवन जिल्ला प्रहरी कार्यालयका डिएसपी सूर्य थापाका अनुसार तत्कालै प्रदेश प्रहरी कार्यालयबाट विपदको लागि खटिएको राफ्ट बोटको टोली घटनास्थलमा पुग्यो।
केहीबेरमै नदीको टापुबाट युवतीको उद्धार भयो।
प्रहरीले उनलाई चितवनको महिला बालबालिका सेवा केन्द्रमा काउन्सिलिङ गराई थप उपचारका लागि भरतपुर अस्पताल पठाएको थियो।
डिएसपी थापाका अनुसार ती २२ वर्षीया युवतीको स्वास्थ्य अवस्था सामान्य छ।
उनी जोगिएपछि प्रहरीले आत्महत्या गर्नुको कारण के होला भन्ने सोधीखोजी त गर्यो। तर उक्त घटना हुनबाट उनी कसरी जोगिइन् भन्ने समेत अनुसन्धानको पाटो बनेको थियो।
प्रहरीले गरेको अनुसन्धानमा ती युवतीले लगाएको लुगाका कारण जोगिएको खुलेको छ।
'घरायसी समस्याका कारण उनले नारायणी नदीको पुलबाट हाम फालेकी हुन्। तर उनको लुगाले जोगायो,'डिएसपी थापाले भने।
ती महिलाले प्रहरी समक्ष दिएको बयान अनुसार नदीमा हाम फालेको केही मिनेटसम्म पनि उनी डुबिनन्। जसले उनलाई आफ्नो जीवनको महत्व बुझायो।
उनले पातलो लामो जामा (गाउन) लगाएकी थिइन्। डुबेर आत्महत्या गर्न खोजेकी महिलालाई उनको लुगाले मर्न भने दिएन।
'केही मिनेटसम्म पनि नडुबेपछि भगवानले बचाउन खोजेको भन्ने सोचें,' युवतीको भनाइ उद्धृत गर्दै डिएसपीले भने,' लुगा पनि बेलुन जस्तो बनेको थियो। जसले डुब्न दिएन र पछि हात खुट्टा चलाउन थालें।'
उनका अनुसार अन्दाजी साढे दुई किलोमिटर त्यसरी नै तैरिएपछि उनी त्यहाँको एक टापु किनारामा पुगेकी हुन्।
खासै पौडी खेल्न नजाने पनि लुगाले गर्दा उनी टापुसम्म पुग्न सफल भइन्।
टापु पुगेर उनले कसैको सहयोग खोजिन्। तर कोही फेला परेनन्।
'टापु गैंडाकोटतिरै कता होला भन्ने सोचेर उनले कसैलाई खोज्न थालिन् तर भेट्टाइनन्,' डिएसपीले भने,'त्यसपछि उनले त्यही रात बिताएर बिहान सहयोग माग्न टापु छेउ आइन्।'
