नारायणगढस्थित नारायणी नदीको पुलबाट हाम फालेकी एक महिलाको १२ घण्टापछि उद्धार गरिएको छ।
सोमबार साँझ ६ बजे नारायणी नदीको पुलबाट एक महिला हाम फालेको खबर चितवन जिल्ला प्रहरी कार्यालयमा आएको थियो।
मंगलबार बिहान भने उनी भरतपुर महानगरपालिका-४ रामघाट नजिकको नारायणी नदीको टापुमा देखिएकी थिइन्।
बिहान भएपछि उनले मर्निङ वाक आएका मानिसहरूलाई हात हल्लाएर गुहारेपछि उद्धार गरेको चितवनका डिएसपी सूर्य थापाले जानकारी दिए।
'हिजो साँझ हाम फालेको भन्ने कुरा आयो तर भेटिएन। बिहान उहाँ आफैंले मर्निङ वाक आउनेहरूलाई मद्दत माग्नु भएछ,'डिएसपी थापाले भने,'हामीलाई खबर भएपछि विपद व्यवस्थापनमा खटिने टोली गएर बिहान सात बजेतिर उनको उद्धार गर्यौं।'
उनले आत्महत्याको प्रयास गरेकी हुँदा उनको परिचय खुलाइएको छैन।
गैंडाकोटकी ती महिलाले घरायसी समस्याका कारण आत्महत्याको प्रयास गरेको डिएसपी थापाले जानकारी दिए।
उनका अनुसार ती महिलाको स्वास्थ्य अवस्था सामान्य छ।
'उनको स्वास्थ्य अवस्था सबै ठीक छ, परिवारको सम्पर्कमा हुनुहुन्छ,'उनले भने।