जिल्ला प्रहरी कार्यालय बाँकेले विभिन्न सरकारी कार्यालयमा बम विस्फोट गराउने फरार प्रतिवादीलाई पक्राउ गरेको छ।
जिल्लाको डुडुवा गाउँपालिका वडा नं. ६ निवासी केशव राढ विगतमा विभिन्न सरकारी कार्यालय र व्यक्तिका उद्योगहरुमा समेत बम विस्फोट कार्यमा संलग्न थिए।
जिल्ला प्रहरी प्रवक्ता सुवास खड्काले केशवविरूद्ध जिल्लामा हत्या, अपहरण, बम विस्फोट तथा फिरौती रकम मागगर्ने जस्ता कार्यमा संलग्नता पुष्टि भइसकेको जानकारी दिए।
विगतमा केशव भूमिगत सशस्त्र भूमिगत समूह तराई जनतान्त्रिक मुक्ति मोर्चा (ज्वाला सिंहमा) आवद्ध रही उनले विभिन्न सरकारी कार्यालय तथा व्यक्तिका निजी सम्पत्तिमा समेत रकम माग गर्दै बम विस्फोट गराएको तथा व्यक्ति अपरहणजस्ता कार्यको गरेको भन्ने खुल्न आएको डिएसपी खड्काले बताए।
जिल्ला प्रहरी कार्यालयबाट खटिएको टोलीले केशवलाई सोमबार डुडुवाको वडा नं. ६ बाट पक्राउ गरेको खड्काले जानकारी दिए।
केशवमाथि २०६८ साल चैत ६ गते साविक गनापुर वडा नं. ९ स्थित प्रकाश अधिकारीको फ्याक्ट्रीमा बम विस्फोट गराएका एक अभियुक्त हुन्।
उक्त मुद्दामा जिल्ला अदालत बाँकेले २०७२ साल माघ १८ गतेको फैसलामा केशवलाई दोषी ठहर गर्दै ६ महिना कैद र ५ हजार रुपैयाँ जरिवानाको फैसला सुनाएको थियो।
त्यस्तै, २०६८ साल मंसिर १४ गते भूमिसुधार कार्यालय बाँकेमा बम विस्फोट गराएको मुद्दामा प्रतिवादी केशवलाई जिल्ला अदालतले २०७२ माघ १८ गतेको फैसला अनुसार थप ६ महिना कैद र ५ हजार रुपैयाँ जरिवाना तोकेको थियो।
त्यस्तै, २०६८ साल मंसिर १४ गते मालपोत कार्यालय बाँकेमा बम विस्फोट गराएको मुद्दामा प्रतिवादी केशवलाई जिल्ला अदालतले सोही मितिमा थप ६ हजार कैद र ५ हजार रुपैयाँ जरिवानाको फैसला सुनाएको थियो।
