संसारकै सबैभन्दा कान्छी प्रधानमन्त्री साना मरिन विवाह बन्धनमा बाँधिएकी छन्। फिनल्यान्डकी ३४ वर्षीया प्रधानमन्त्री मरिनले १६ वर्षदेखिका प्रेमी मार्कस राइकोनेनसँग गत शनिबार विवाह गरेकी हुन्।
प्रधानमन्त्रीको सरकारी निवासमा सीमित आफन्त र नातेदारको उपस्थितिमा उनीहरूको विवाह भएको डेली फिनल्यान्डले जनाएको छ।
मरिनले खुसी व्यक्त गर्दै विवाहका तस्बिरहरू सामाजिक सञ्जाल इन्स्टाग्राममा राखेकी छन्।
‘हामीले कैयौं कुरा सँगै अनुभव गरेका छौं, आनन्द र पीडा बाँडेका छौं, सुख र सन्तापमा एक अर्कालाई सहयोग गरेका छौं,’ उनले लेखेकी छन्।
उनीहरू दुबै जना १८ वर्षका हुँदा टाम्पेरामा पहिलो पटक भेट भएको थियो। त्यसपछि सँगै बस्दै आएका यो जोडीकी साढे २ वर्षकी छोरी छन्।