विश्व स्वास्थ्य संगठनका नेपाल प्रतिनिधि जोस भ्याण्डेलरले कोभिड १९ संक्रमणको जोखिम न्यूनीकरणका लागि एक अर्काबीच दूरी कायम गर्न आग्रह गरेका छन्।
पछिल्लो समय सरकारले लकडाउन हटाएपछि सर्वसाधारणले आफ्नो व्यवहारमा परिवर्तन नगरेका कारण संक्रमण बढ्दै गएको छ।
भीडभाड बढ्न थालेपछि विश्व स्वास्थ्य संगठनको नेपाल प्रतिनिधि भ्याण्डेलरले खोक्दा, छुँदा संक्रमण फैलिरहेको भन्दै कम्तिमा १ मिटरको दूरी कायम गरेर क्रियाकलाप गर्न आग्रह गरे। त्यस्तै मास्कको प्रयोग र हात धुने बानीले संक्रमणको झिनो सम्भावना हुने भएकाले सबैलाई सजगताका साथ प्रयोग गर्न उनले आग्रह गरे।
‘यो रोग संक्रामक भए पनि जोगिनका लागि सजिलो उपायहरु छन्’ उनले भने ‘हामीले एक अर्का बीच कम्तिमा १ मिटरको दूरी कायम गर्न सक्यौं भने पनि जोगिन सहयोग पुग्छ।’
दूरी कायम गर्न सकेमा संक्रमण रोक्न, लकडाउन हुन नदिन, संक्रमण समुदायमा फैलनबाट रोक्न सकिने उनले बताए। ‘भौतिक दूरी संक्रमण रोक्ने एक अचुक कडी हो, मास्कको प्रयोग अर्को सरल उपाय हो, नियमित हात धुने र कसैलाई छुन नपरेमा संक्रमणबाट जोगिइन्छ’ उनले भने।
