इटहरी महानगरपालिकामा कार्यरत एक जना इन्जिनियरमा कोरोना भाइरसको संक्रमण पुष्टि भएको छ।
उनमा बुधबार राति संक्रमण पुष्टि भएको उपमेयर लक्ष्मी गौतमले जानकारी दिइन्।
अहिले संक्रमित घरमै सेल्फ आइसोलेसनमा बसेका छन्।
'उहाँमा कुनै लक्षण छैन। त्यसैले घरमै आइसोलेसनमा बसिरहनु भएको छ,' उपमेयर गौतमले भनिन्।
एक कर्मचारीमा संक्रमण पुष्टि भएपछि उपमहानगरपालिकाले अत्यावश्यकबाहेक सबै सेवा बन्द गरेको छ।
साथै आज बजार क्षेत्र पनि कडाइ गरिएको छ।
अहिले उपमहानगरपालिकाका मेयरसहित थप कर्मचारीहरूको पनि परीक्षण गर्ने तयारी गरिएको छ।
'सुरूमा संक्रमित कार्यरत शाखाका कर्मचारीको परीक्षण गर्छौं। त्यसपछि कस्तो नतिजा आउँछ अनि थप कर्मचारीको परीक्षण गर्छौं,' उपमेयर गौतमले भनिन्।
उपमहानगरपालिकाले आफ्ना केही कर्मचारीहरूको परीक्षण गर्ने भनेपछि इन्जिनियरमा संक्रमण पुष्टि भएको हो। उनको धरानस्थित बीपी कोइराला स्वास्थ्य विज्ञान प्रतिष्ठानमा परीक्षण गरिएको थियो।