कमलादीमा साढे १४ केजी चाँदी र आधा केजी सुन छाडेर भागेको गाडीलाई समात्न नसकेको विषयमा अनुसन्धान गर्न छानबिन समिति गठन भएको छ।
गाडीलाई समात्न नसकेको विषयमा अनुसन्धान गर्न बुधबार महानगरीय अपराध महाशाखाका प्रमुख एसएसपी दीपक थापाको नेतृत्वमा छानबिन समिति गठन भएको हो।
'पाँच जनाको छानबिन समिति गठन भएको छ। यसले अब किन समात्न नसकेको भन्ने छानबिन गर्छ। प्रहरीले उनीहरूलाई पक्राउ गर्न सक्ने अवस्थामा पनि नगरेको देखिएमा कारबाही गर्छौं,' महानगरीय प्रहरी कार्यालय, रानीपोखरीका डिआइजी विश्वराज पोखरेलले भने।
यस समितिमा एसएसपी दीपक थापा, एसएसपी किरण बज्राचार्य, एसपी सोमेन्द्रसिंह राठोर, डिएसपी दुर्गा दाहाल र डिएसपी राजकुमार केसी छन्।
मंगलबार बिहान नौ बजे महानगरीय प्रहरी वृत्त, दरबारमार्गले नियमित चेकिङ गर्नेक्रममा झोला फ्याँकेर भाग्दा प्रहरीले गाडीलाई समात्न सकेको थिएन।
प्रहरीले उनीहरूको पिछा गरे पनि गाडीबाट झोला फ्याँकेपछि प्रहरीको ध्यान झोलामा जाँदा उनीहरू उम्किएका थिए।
त्यसै विषयमा प्रहरीको त्रुटि छ वा छैन भन्ने विषयमा अनुसन्धान गर्न छानबिन समिति गठन गरेको हो।
