कोरोनाभाइरस महामारीको सुरू भएको चीनमा साढे तीन महिनापछि बुधबार एकैदिन सयभन्दा बढी संक्रमित भेटिएका छन्।
साउथ चाइना मर्निङ पोष्टका अनुसार बुधबार चीनका विभिन्न सहरमा १०१ जनामा कोरोना संक्रमणको पुष्टि भएको छ।
चीनको राष्ट्रिय स्वास्थ्य आयोगका अनुसार सुदूर पश्चिमी प्रान्त सिन्जियाङमा ८९ जना संक्रमित भेटिएका छन्। उइघुर मुस्लिम समुदायको बसोबास रहेको सिन्जियाङमा भेटिएका संक्रमितमध्ये आधा जतिलाई कुनै लक्षण नदेखिएको बताइएको छ।
त्यहाँ मंगलबार ६ जना संक्रमित निको भएर घर फर्किएका थिए।
उत्तरपूर्वी प्रान्त लियाओनिङमा बुधबार ८ जनामा कोरोना संक्रमण पुष्टि भएको छ। सोही प्रान्तबाट राजधानी बेइजिङ आएका एक जनामा पनि कोरोना देखिएको आयोगले जनाएको छ।
लियाओनिङको दालियान सहरबाट चीनका कम्तिमा पनि अरू ९ सहरमा कोरोना फैलिएको चिनियाँ अधिकारीहरूले बताएका छन्।
पहिलो चरणको संक्रमणलाई नियन्त्रणमा लिएको चीनमा बुधबारसम्म ८४ हजार ६० जनामा संक्रमण देखिएको छ भने ४ हजार ६ सय ३४ जनाको मृत्यु भएको छ।
चीनसँगै छिमेकी दक्षिण कोरिया र भियतनाममा पनि बुधबार कोरोनाका संक्रमित बढेका छन्।
दक्षिण कोरियामा पछिल्लो समय औसतमा दैनिक २० जना नयाँ संक्रमित थपिने गरेकोमा बुधबार ४८ जना थपिएका छन् भने भियतनामको दा नाङ सहरमा मात्र २० जना संक्रमित फेला परेका छन्।
छिमेकी चीनबाट कोरोनाको महामारी फैलिएको भएपनि भियतनामले अहिलेसम्म कोरोनालाई नियन्त्रणमा राखेको थियो। भियतनाममा अहिलेसम्म एक जना संक्रमितको पनि मृत्यु भएको छैन।