२०७३ साउन ७ गतेको मन्त्रिपरिषद बैठकले नेपालमा संचालन भइरहेका विदेशी टिभी च्यानलमा क्लिनफिड लागू गर्ने नीति पारित गर्यो।
त्यसको सर्वत्र स्वागत भयो। तर लागू अहिलेसम्म हुन सकेको छैन। आगामी कात्तिक ८ गतेबाट लागू गर्नेगरी समय तोकिएको छ।
नेपाल मिडिया सोसाइटीले आगामी आर्थिक वर्षको सुरु अर्थात साउनबाट नै क्लिनफिड लागू गर्न सरकारसँग आग्रह गरेको छ। सञ्चार तथा सूचना प्रविधिमन्त्री डा. युवराज खतिवडालाई भेटेर सोसाइटीले क्लिनफिड साउनबाट नै लागू गर्न भनेको हो।
सबै सेवा प्रदायकहरु क्लिनफिडका लागि तयार भएकाले तीन महिना पर्खिनुभन्दा आर्थिक वर्षको सुरुबाटै लागू गर्दा कुनै समस्या नहुने सोसाइटीका अध्यक्ष शुभशंकर कँडेलले बताए। आर्थिक वर्षको सुरुआतबाट नै विज्ञापनरहित विदेशी च्यानलको प्रशारण हुनुपर्ने उनले बताए।
विदेशी च्यानलमा क्लिनफिड भनेको नेपालको सीमाभित्र प्रसारण, वितरण हुने विदेशी च्यानल पूर्णरुपमा विज्ञापनरहित हुनु हो।
ध्यानाकर्षण पत्र बुझ्दै सरकारका प्रवक्ता समेत रहेका मन्त्री खतिवडाले यो विषयमा मन्त्रालयले गृहकार्य गरिरहेको बताए।
कानुनतः कात्तिक ८ गतेबाट लागू हुनेभए पनि सरकारका कुनै प्रशासनिक निणयबाट छिटो गर्न सकिन्छ कि भन्ने विषयमा मन्त्रालय गृहकार्यमा जुटिरहेको उनको भनाइ छ।
कात्तिकभन्दा अगाडि नै क्लिनफिडमा जान सकिने अवस्था भएमा छिट्टै मन्त्रिपरिषद्मा प्रस्ताव लगेर निर्णय हुन सक्ने पनि उनले बताए।
साथै सोसाइटीले भारतीय समाचार च्यानलले पछिल्लो समय तल्लो स्तरको टिप्पणी गरेकोप्रति घोर भत्सर्ना गरेको छ।
‘भारतीय मिडियाको नेपालप्रतिको रबैयाले एकातिर पत्रकारिताका न्यूनतम विश्वव्यापी मूल्य, मान्यता, अभ्यास र सामान्य सिद्धान्तको खिल्ली उडाएको छ भने अर्कोतिर भारतीय मिडियाले आफैलाई नङ्ग्याएको छ’ सोसाइटीले भनेको छ।
