नेपाल प्रहरीका नवनियुक्त महानिरीक्षक शैलेश थापा क्षेत्रीलाई बधाई दिन नेपाली सेनाका प्रधानसेनापति पूर्णचन्द्र थापा प्रहरी प्रधान कार्यालय पुगेका छन्।
बिहीबारदेखि कार्यभार सम्हालेका क्षेत्रीलाई बधाई दिन प्रधानसेनापति थापा शुक्रबार नक्सालस्थित प्रहरी प्रधान कार्यालय पुगेका हुन्।
उनीहरूबीच शिष्टाचार भेट भएको नेपाल प्रहरीका केन्द्रीय प्रवक्ता डिआइजी निरज शाहीले जानकारी दिए।
'उहाँ बधाई दिन आउनुभएको हो। यो दुई संगठन प्रमुख बीचको शिष्टाचार भेट हो,' नेपाल प्रहरीका केन्द्रीय प्रवक्ता डिआइजी निरज शाहीले भने,'यसरी प्रधानसेनापति आइजिपीलाई बधाई दिन आएको पहिलो पटक हुन सक्छ तर आधिकारिक रूपमा भन्न सक्दिनँ किनकी पहिला-पहिला धेरै कुरा रेकर्ड हुन्थेन।'
भेटघाटमा दुवैले संगठनबीच आपसी हित, सहकार्य र समन्वयका सम्बन्धमा छलफल गरेको नेपाल प्रहरीले बताएको छ।
प्रधानसेनापति थापाले आइजिपी क्षेत्रीलाई अनुभव र ज्ञानको संगालोका पुस्तकहरू र राष्ट्रको सुरक्षाको संकेतको रूपमा खुकुरी समेत प्रदान गरेका थिए।
महानिरीक्षक क्षेत्रीले पनि प्रधानसेनापति थापालाई मायाको चिनो स्वरूप ‘मोमेन्टो’ प्रदान गरेका थिए।
