महानगरीय प्रहरी प्रभाग लुभूमा कार्यरत २१ प्रहरीको कोरोना बीमा भएको छ।
कोरोनाभाइरस महामारीको बेलामा खटिएका प्रभागका २१ जना प्रहरीको एक-एक लाख बराबरको कोरोना बीमा गरिएको हो।
सो बीमा महालक्ष्मी नगरपालिका वडा नम्बर ८ को वडा समितिले एक समाजसेवी नवराज शिवाकोटीसँग समन्वय गरी प्रभागका सबैको कोरोना बीमा गराएको हो।
वडा सदस्यद्वय अनिल श्रेष्ठ र आशिष केसीको पहलमा सो कार्य भएको हो।
'उहाँहरू यो महामारीको बेलामा अग्रपंक्तिमा खटिनुभएको छ,'वडा सदस्य आशिष केसीले भने,'त्यसैले हामीहरूले उहाँहरूको हौसला बढाउनका लागि तथा सुरक्षाका लागि कोरोना बीमाको पहल गरिदिएका हौं। यसले उहाँहरूको मनोबल समेत उच्च बनाउने छ।'
लुम्बिनी जनरल इन्सुरेन्स कम्पनी लिमिटेडबाट जारी भएको उक्त बीमाको पोलिसी पत्र शनिबार बिहान प्रभागका प्रमुख सई रत्न बहादुर थापासमक्ष हस्तान्तरण गरिएको थियो।
'अब उहाँहरू कसैमा कोरोनाभाइरसको संक्रमण देखियो भने एक लाख पाउनुहुन्छ र ढुक्क भएर स्वास्थय उपचार गराउन सक्नुहुन्छ,'वडा सदस्य केसीले भने,'अहिलेसम्म सायद प्रहरीहरूको कतै पनि बीमा गरिएको छैन।'
