बझाङमा पहिरोमा पुरिएका ७ मध्ये ६ जनाको शव फेला परेको छ।
केदारस्युँ गाउँपालिकाको वडा नम्बर ८ मल्लेसीमा गएराति १ बजेतिर पहिरो जाँदा ७ जना पुरिएका थिए।
मृत भेटिनेमा वर्ष ५० की राममति जेठारा, अन्दाजी वर्ष १० की अस्मिता जेठारा, ७ वर्षका प्रयाग जेठारा, १५ वर्षीय शान्ति जेठारा, १४ वर्षीय सन्तु जेठारा र ४६ वर्षीय रामकला रहेका जिल्ला प्रहरी कार्यालय बझाङका सूचना अधिकारी प्रहरी निरीक्षक लोकेन्द्र सिंहले बताए ।
उनले भने, ‘घटनास्थलमा अझै प्रहरी, सेना, सशस्त्र प्रहरी टोली पुग्न समय लागेकाले उद्धारको काम पनि ढिला भइरहेको हो।’
एक जनाको खोजी कार्य भइरहेको गाउँपालिकाका उपाध्यक्ष निशा धामीले बताइन्।
उनले भनिन्, ‘बेपत्ता २० जना भएको भनिए पनि उनीहरूमध्ये १३ जना रातारात भागेर छानामा लुकेका रहेछन्।’
बिहान नभेटिएकोले उनीहरू पनि बेपत्ता भए भन्ने थियो तर, अहिले उनीहरू पनि भेटिइसकेको उपाध्यक्ष धामीले बताइन्।
यस्तो पहिरोमा पशुचौपाया पनि पुरिएका छन् भने भौतिक सम्पत्ति पनि ठूलो मात्रामा क्षति भएको प्रहरीले जनाएको छ।