नेपालमा कोरोना भाइरस संक्रमणबाट मृत्यु हुनेको संख्या ३४ पुगेको छ।
शनिबार गोरखाको पालुङटार नगरपालिका वडा नम्बर ७ का ४४ वर्षीय पुरूषको निधन भएको हो। उनी असार १७ गते कतारबाट नेपाल आएका थिए। लगत्तै उनी पालुङटारस्थित क्वारेन्टिनमा बसेका थिए।
शुक्रबार खोकीलाग्नेजस्ता समस्या देखिएपछि उनलाई गोरखा अस्पतालको आइसोलेसनमा लगिएकोमा शनिबार बिहान ५ बजे मृत्यु भएको थियो। स्वास्थ्य मन्त्रालयका प्रवक्ता डाक्टर जागेश्वर गौतमका अनुसार उनी मधुमेह र निमोनियाका बिरामी पनि थिए। उनको स्वाब असार १८ गते संकलन गरी १९ गते कोरोना पुष्टि भएको थियो।
उनको शव नेपाली सेनाले व्यवस्थापन गर्दैछ।
यस्तै रूपन्देही देवदहका ७५ वर्षीय पुरूषमा मृत्युपछि कोरोना पुष्टि भएको छ। डाक्टर गौतमका अनुसार ती वृद्धको असार १७ गते मृत्यु भएको थियो। उनी त्रिवि शिक्षण अस्पतालमा उपचाररत थिए। उनको स्वाब परीक्षण गर्दा असार १८ गते कोरोना पोजेटिभ देखिएको हो। उनी क्षयरोगका बिरामी पनि थिए।
यो पनि:
शवबाट कोरोना सर्दैन: स्वास्थ्य मन्त्रालय
