निजामति विधेयकमा आफूहरूले उठाएका माग समावेश नगरेसम्म नायब सुब्बाहरूले आन्दोलनलाई जारी राख्ने बताएका छन्।
बिहीबार निजामती सेवामा ना.सु. बचाउ अभियान (राजपत्र अनंकित कर्मचारी संरक्षण आन्दोलन) का तर्फबाट प्रेस विज्ञप्ति निकालेर उनीहरूले हालै राज्य व्यवस्था तथा सुशासन समितिबाट पारित भएको विधेयकको विरोध गरेका हुन्।
‘राजपत्र अनंकित कर्मचारीहरुको मनोबल कमजोर हुने, वृत्ति विकासमा बाधा पुग्ने, हाम्रो योगदानको अवमूल्यन हुने तथा प्राकृतिक न्यायको सिद्धान्त विपरीत हामीमाथि अन्याय एवं भेदभाव हुने भएकोले प्रस्तावित सङ्घीय निजामती सेवा ऐनप्रति तीब्र असहमति जनाउँदै यस निजामती सेवामा ना.सु. बचाऊ अभियान (राजपत्र अनंकित कर्मचारी संरक्षण आन्दोलन) ले छ बुँदे माग राखी आन्दोलनको कार्यक्रम सुरु गरेको व्यहोरा अवगत नै छ,’ उनीहरूले भनेका छन्।
निजामती कर्मचारीहरुको आधिकारिक ट्रेड युनियन र राष्ट्रियस्तरका ट्रेड युनियनहरूसँग पटक पटक भएको छलफलपछि आधिकारिक ट्रेड युनियनले प्रधानमन्त्रीसमक्ष बुझाएको माग पत्रमा धेरैजसो विषयहरूलाई समावेश गरेकोमा उनीहरूले धन्यवाद दिएका छन्।
‘हाम्रा बाँकी मागहरुसहित निजामती सेवाको सुधारको लागि पेश भएका अन्य विषयहरू समेत प्रस्तावित सङ्घीय निजामती सेवा ऐनमा समावेश गराउन सम्बन्धित निकायसँगको वार्ता, छलफल, बहस पैरवी तथा आन्दोलनलगायतका सबै प्रयत्न जारी राख्न अपिल गर्दै त्यस्ता कार्यक्रम एवं गतिविधिमा हाम्रो समर्थन र सक्रिय सहभगितामा हुने प्रतिबद्धता व्यक्त गर्दछौं,’ उनीहरूले भनेका छन्।
आफूहरूले उठाएका सबै माग प्रस्तावित ऐनमा समावेश नहुँदासम्म आन्दोलन जारी रहेको उनीहरूको भनाइ छ।
‘हाम्रो आन्दोलन कसैप्रति लक्षित एवं कसैका विरूद्ध नभई सबै तहमा रहेका राजपत्र अनंकित कर्मचारीहरुको पेशागत हकहित स्थापित गर्नको लागि भएकोले विकसित परिस्थितिको मूल्याङ्कन गरी थप कार्यक्रमहरू क्रमश घोषणा एवं सञ्चालन हुनेछन्,’ उनीहरूले थपेका छन्।
यो पनि:
निजामती विधेयकमा यस कारण नासुहरुको विरोध
निजामती विधेयकविरूद्ध सिंहदरबारभित्रै कर्मचारीको प्रदर्शन
मन्त्री छलफल आवश्यक छ भन्दै थिए, समितिले पारित गरिदियो निजामती विधेयक
संघीय निजामती विधेयकका प्रावधानको कर्मचारीबाटै विरोध
