वीरेन्द्रनगर नगरपालिका वडा नम्बर ४ का कार्यालय प्रशासन सहायकलाई अख्तियारले पक्राउ गरेको छ। करार सेवामा कार्यरत प्रशासन सहायक रत्नबहादुर विकलाई अख्तियारले पक्राउ गरेको हो।
वडा कार्यालयबाट उठाएको राजश्व रकम कार्यालयको खातामा जम्मा नगरी हिनामिना गरेको भन्ने सूचनाका आधारमा उनलाई पक्राउ गरिएको अख्तियार दुरुपयोग अनुसन्धान आयोगको केन्द्रीय कार्यालयले जनाएको छ।
वीरेन्द्रनगर–१३ स्थायी बसोवास गर्ने विकलाई रकम हिनामिना गरेको भन्ने उजुरी तथा सूचनाका आधारमा घर नजिकैबाट पक्राउ गरिएको आयोग कार्यालय सुर्खेतका सूचना अधिकारी मेघनाथ सापकोटाले जानकारी दिए।
उनले हिनामिना गरेको रकम भने एकीन हुन नसकेको उनले बताए।
‘वडा र नगरपालिकाबाट छुट्टाछुट्टै रकम खुलाइएको छ, अहिलेसम्म एकीन भने भएको छैन,’ सापकोटले भने, ‘यसबारेमा अनुसन्धान हुन्छ।’
