कैलालीमा भैंसीले हानेर एक महिलाको मृत्यु भएको छ।
धनगढी उप–महानगरपालिका वडा नम्बर १५ कनरीमा आइतबार बिहान बाख्रा चराउन गएकी ८९ वर्षीया लक्ष्मी भण्डारीको छिमेकीको भैंसीले हान्दा मृत्यु भएको प्रहरीले जनाएको छ।
जिल्ला प्रहरी कार्यालय कैलालीका इन्स्पेक्टर हिक्मत थापाले एक्कासि भैंसीले आक्रमण गरेपछि घाइते भएकी महिलाको उपचारका लागि अस्पताल पुर्याइएपछि उनको मृत्यु भएको बताए।
मृतकका आफन्त पर्ने कविराज खातीले कनरी पुल नजिकै खुटीया नदी किनारमा बाख्रा चराउन गएका बेला घटना भएको बताए।
भैंसीले हान्दा मृतक महिलाको हात र खुट्टा भाँचिएको र छातीमा खुरले टेकेको उनले बताए।
महिलाको हिजो नै दाहसंस्कार भैसकेको खातीले जानकारी दिए।
