जोरपाटीस्थित नेपाल मेडिकल कलेजका चिकित्सकमाथि भएको कुटपिट र सिसिटिभी फुटेज डिलिटसम्बन्धी छानबिन गर्न तीन सदस्यीय समिति बनाइएको छ।
आइतबार अस्पतालले डिआइजी विश्वराज पोखरेलसँग कुराकानी गरी छानबिन गर्न महानगरीय प्रहरी परिसर काठमाडौंका एसपी सोमेन्द्रसिंह राठौरको संयोजकत्वमा तीन सदस्यीय समिति गठन भएको हो।
'पुलिस हेडक्वाटरको फ्रेन्सिक ल्याबमा सिसिटिभीको फुटेज रिट्रिभ गर्ने काम भइरहेको छ,'अस्पतालका महासचिव डाक्टर बद्री रिजालले जारी गरेको विज्ञप्तिमा भनिएको छ।
साथै चिकित्सकमाथि भएको कुटपिटप्रति छानबिन गर्न स्वास्थ्यमन्त्रीले गृहसचिवसँग कुरा गरी कारबाही अघि बढाएको समेत उनले जानकारी दिएका छन्।
चार दिनदेखि नेपाल मेडिकल कलेजका चिकित्सकहरू आन्दोलनमा थिए। गत १४ गते एक बिरामीको मृत्यु भएपछि बिरामीको परिवारले चिकित्सकमाथि हातपात गरेका थिए।
कारबाहीको लागि सिसिटिभीको फुटेजसमेत माग गर्दा हटाइएको देखिएपछि चिकित्सकहरूले इमर्जेन्सी, फिभर क्लिनिक र आइसोलेसनबाहेक सबै सेवा बन्द गरेका हुन्।
आइतबार उनीहरूले अस्पताल परिसरभित्रै नाराबाजी तथा प्लेकार्ड बोकेर विरोध गरेका थिए। त्यसपछि नेपाल मेडिकल कलेजका महासचिवको नेतृत्वमा पाँच जना कार्यकारिणी समितिमा छलफल गरेका थिए।