सर्लाहीमा बुवाको हत्या गरेको आरोपमा प्रहरीले छोरालाई पक्राउ गरेको छ।
बुधबार बिहान बसबरिया गाउँपालिका ५ धनगडा बस्ने ७० वर्षीय रामअधिन रायको हत्या गरेको आरोपमा ४० वर्षीय छोरा विनोद रायलाई पक्राउ गरेको हो।
मंगलबार राति गोठमा सुतिरहेका रायको टाउको तथा अनुहारमा लाठीले हानेर हत्या भएको खबर जिल्ला प्रहरी कार्यालय सर्लाहीले पाएको थियो।
सोही सूचनाका आधारमा ईलाका प्रहरी कार्यालय बरहथवा र जिल्ला प्रहरी कार्यालयको टोली घटनास्थलमा पुगेको थियो।
‘छोराले हत्या गरेको हो कि होइन भन्ने अहिले भन्न सकिन्न,’ डिएसपी मदन कुँवरले भने, ‘तर हामीले उसलाई खाट मुनि लुकेको अवस्थामा पक्राउ गरेको भएर शंका गर्ने आधार थपिएको हो।’
उनीमाथि अनुसन्धान थालिसकेको डिएसपी कुँवरले बताए।