भारतको गुजरातबाट वीरेन्द्रनगर आइपुगेका एक युवाको मंगलबार राति मृत्यु भएको छ।
मंगलबार नेपालगञ्जबाट चिङ्गाड जाने बसमा चढेका ती युवालाई असजिलो भएपछि सुर्खेतको सुब्बाकुनाबाट एम्बुलेन्समार्फत् प्रदेश अस्पताल पुर्याइएको थियो। सुर्खेतको चिङ्गाड गाउँपालिका–५ का २२ वर्षीय युवकको प्रदेश अस्पताल कालागाउँ पुग्ने क्रममै बाटोमा मृत्यु भएको हो।
अस्पतालका कोरोना फोकल पर्सन डा केएन पौडेलले अस्पतालमा भर्ना हुनेबित्तिकै आफूहरूले जाँच गर्दा उनको मृत्यु भइसकेको जानकारी दिए।
‘राति साढे १२ बजेतिर खबर पाउनेबित्तिकै हामी जाँच गर्न गर्यौं, उनको मृत्यु भइसकेको रहेछ’, डा पौडेलले भने।
अस्पतालका निर्देशक डा. डम्बर खड्काले मृतक युवकका साथै उनको साथमा एम्बुलेन्समा आएकाहरूको स्वाब संकलन गरी कोरोना परीक्षण कार्य भइरहेको र दिउँसोसम्म रिपोर्ट आउने जानकारी दिए। आफन्तका अनुसार ती युवामा बाथरोगसम्बन्धी समस्या थियो।
