भारतबाट आएका कैलाली गौरीगंगा नगरपालिका-७ का ५५ वर्षीय पुरुषको सेती प्रादेशिक अस्पतालको आइसोलेसनमा मृत्यु भएको छ।
मंगलबार दिउँसो आइसोलेसनमा भर्ना गरिएको उनको आज बिहान ६ बजे मृत्यु भएको अस्पतालका सूचना अधिकारी दिलिप श्रेष्ठले जानकारी दिए।
भारतको महाराष्ट्रबाट आएको बुझिएको उनलाई गौरीफन्टा नाकाबाट सिधै आइसोलेसनमा ल्याइएको थियो।
अस्पतालमा ल्याएर उनको र्यापिड टेस्ट गर्दा नेगेटिभ देखिएपनि पिसिआर परीक्षणको लागि स्वाब झिकिएको श्रेष्ठेले बताए।
ती पुरुषलाई हिजो नाकामा मृगी (चक्कर लाग्ने र मुखबाट फिज) आउने समस्या देखिएपछि सेती अस्पतालको आइसोलेसनमा भर्ना गरिएको थियो।
श्रेष्ठले भने, 'उहाँमा कोरोनाको लक्षण त देखिएको थिएन। र्यापिड टेस्टको नतिजा पनि नेगेटिभ आएको छ तर पनि पिसिआरको नतिजा नआइ केही भन्न मिल्दैन।'
उनले मृतकको कोरोना परीक्षणको नतिजा दिउँसोसम्म आइपुग्ने बताए।
