नेपालमा पछिल्लो २४ घण्टामा थपिएका ९० जना कोरोना संक्रमितमा प्रदेश ५ का मात्रै ३८ जना रहेका छन्।
स्वास्थ्य तथा जनसंख्या मन्त्रालयका अनुसार प्रदेश ५ को कपिलवस्तुमा २६, बाँकेमा ७, गुल्मी र अर्घाखाँचीमा २/२ र रुपन्देहीमा एक जना संक्रमित थपिएका हुन्।
योसँगै प्रदेश-५ मा कूल संक्रमितको संख्या ३ सय ३१ पुगेको छ।
सोमबार कूल संक्रमितको संख्या प्रदेश ५ मा २ सय ९२ थियो।
पछिल्लो २४ घण्टामा थपिएका कोरोना संक्रमितमा कपिलवस्तुको यशोधरा गाउँपालिकाका २४ जना छन्।
कपिलवस्तुका कोरोना फोकल पर्सन कुमार थापाका अनुसार यशोधरा गाउँपालिकाको अनिरुद्र मावि क्वारेन्टिनमा रहेका २४ जनाको स्वाब परीक्षणमा कोरोना पोजेटिभ आएको हो।
यशोधरा वडा नं. १ का २४ देखि ५५ वर्ष उमेरका १२ जना पुरूष, वडा नं.२ का २२ देखि २४ वर्ष उमेरका ४ जना पुरूष र २ वर्षीय बालिकामा संक्रमण पुष्टि भएको थापाले जानकारी दिए।
त्यस्तै, यशोधराकै वडा नं. ८ का १९ देखि ४० वर्ष उमेरका ७ जना पुरूष पनि कोरोना पोजेटिभ पाइएका छन्।
यसैगरी, कपिलवस्तु नगरपालिका वडा नं. १२ का २२ वर्ष र मायादेवी गाउँपालिका वडा नं. ७ का ५० वर्षका पुरूषमा पनि कोरोना संक्रमण पुष्टि भएको हो।
यस्तै, पछिल्लो संक्रमण पुष्टि हुनेमा बाँकेको डुडुवा गाउँपालिकाका २०, २१, ३६ र ४० वर्षका ४ जना पुरूष कोरोना पोजेटिभ भेटिएका छन्।
बाँकेको राप्ती सोनारी गाउँपालिकाका ४६ र ३८ तथा बैजनाथ गाउँपालिकाका ३० वर्षीय पुरूषमा पनि कोरोना संक्रमण पुष्टि भएको हो।
यस्तै, बुटवलस्थित लुम्बिनी प्रादेशिक अस्पतालमा उपचार गराइरहेका एक जनामा पनि कोरोना संक्रमण पुष्टि भएको छ। प्रदेश ५ का पहाडी जिल्ला अर्घाखाँची र गुल्मीमा पनि २/२ जना नयां संक्रमित थपिएका छन् ।
अर्घाखाँचीमा पहिलोपटक पाणिनी गाउंपालिका वडा नं. ८ का १९ र ४३ वर्षीय दुई जना पुरूषमा संक्रमण पुष्टि भएको हो भने गुल्मीको धुर्कोट गाउँपालिका वडा नं. ४ का ३६ वर्षका पुरूषमा संक्रमण पाईएको हो ।
गुल्मीका एकजना संक्रमित गाउँपालिकाका अध्यक्ष भुपाल पोखरेल रहेका छन्। पोखरेलले विज्ञप्ति जारी गर्दै आफूलाई कोरोना संक्रमण पुष्टि भएकोले आफ्नो सम्पर्कमा आएकाहरूलाई क्वारेन्टिनमा बस्न आग्रह गरेका छन् ।