धनुषामा आज थपिएका तीन जना कोरोना संक्रमितमध्ये दुई जना सुरक्षाकर्मी रहेको पाइएको छ।
धनुषाको नगराईन नगरपालिका–३ फुलगामाका तीन जना व्यक्तिमा कोरोना संक्रमण देखिएको हो।
धनुषाका प्रमुख जिल्ला अधिकारी कोषहरी निरौलाले जानकारी दिए अनुसार संक्रमित तीन जनामध्ये दुई जना प्रहरी हुन् भने एक जना भारतबाट आएका व्यक्ति हुन्।
तीनै जनाको गत जेठ ७ गते नगराईन नगरपालिकाको गंगुलीस्थित प्रादेशिक क्वारेन्टिनमा स्वाब संकलन गरिएको थियो।
ईलाका प्रहरी कार्यालय फुलगामामा कार्यरत रहेका एक जना प्रहरी सहायक निरीक्षक (असई) र १ जना प्रहरी जवान रहेका छन्।
प्रजिअ निरौलाले भने, 'ती सुरक्षाकर्मीहरूको क्वारेन्टिनमा ड्युटी रहेको थियो, उनीहरू क्वारेन्टिनमा थपिएकाहरूको रेकर्ड संकलन गर्न जान्थे, अर्का एक जना धनुषाकै रहेको र उनी भारतबाट आएका थिए।'
तर भारतको कुन ठाउँबाट आएका हुन् भन्ने जानकारी प्राप्त भइनसकेको प्रमुख जिल्ला अधिकारी निरौलाले बताए।
ती सुरक्षाकर्मी क्वारेन्टिनमा ड्युटी गरेर प्रहरी चौकी फर्किने गरेका थिए। गंगुलीस्थित प्रादेशिक क्वारेन्टिन भने केही दिनअघि सिल गरिएको छ।