सिरहा, भक्तपुर, सुर्खेत, मकवानपुर र मोरङका छुट्टाछुट्टै स्थान भएका दुर्घटनामा पाँच जनाको मृत्यु भएको प्रहरीले जनाएको छ।
सिरहा, गोलबजारस्थित सडकमा बुधबार साँझ ना१ज ८०८८ नम्बरको म्याजिक गाडीको ठक्करबाट नाम, थर नखुलेका करिब ५० वर्षीय पुरुषको घटनास्थलमै मृत्यु भएको छ। गाडी र चालकलाई प्रहरीले नियन्त्रणमा लिएको छ।
भक्तपुर नगरपालिका महांकालस्थित सडकमा बा६७प ४८७१ नम्बरको मोटरसाइकल अनियन्त्रित भई बुधबार बेलुका दुर्घटना हुँदा मोटरसाइकल चालक सिन्धुली गलन्जर गाउँपालिका घर भई भक्तपुर दुवाकोट बस्ने २० वर्षीय गणेश वयलकोटीको मृत्यु भएको छ। दुर्घटनामा गम्भीर घाइते भएका गणेशको केएमसी अस्पताल दुवाकोट लैजाने क्रममा बाटोमै मृत्यु भएको हो।
सुर्खेत, वीरेन्द्र नगरपालिकाका १२ मा भे४३प ८४४६ नम्बरको मोटरसाइकल अनियन्त्रित भई बुधबार राति दुर्घटना हुँदा मोटरसाइकलमा सवार सोही नगरपालिका २३ का ११ वर्षीय उदय परियारको मृत्यु भएका छन्। दुर्घटनामा गम्भीर घाइते भएका उनको कर्णाली प्रदेश अस्पताल सुर्खेतमा उपचारको क्रममा मृत्यु भएको हो।
मकवानपुरको बकैया गाउँपालिका ३ मा नम्बर नखुलेको ट्रयाक्टर अनियन्त्रित भई बुधबार बेलुका दुर्घटना हुँदा ट्रयाक्टर चालक बारा निजगढ नगरपालिका ५ ३४ वर्षीय पर्शुराम सिटौलाको मृत्यु भएको छ। दुर्घटनामा गम्भीर घाइते भएका सिटौलाको जिल्ला अस्पताल भरतपुरमा उपचारको क्रममा मृत्यु भएको हो।
मोरङ, धनपाल गाउँपालिका ६ पिण्डेश्वरीमा मे१ख ४०९० नम्बरको बस अनियन्त्रित भई बिहीबार बिहान दुर्घटना हुँदा बसमा सवार विराटनगर महानगरपालिका १५ का ३२ वर्षीय सानु साहको मृत्यु भएको छ।
दुर्घटनामा गम्भीर घाइते भएका सानुको न्यूरो अस्पताल विराटनगरमा उपचारको क्रममा मृत्यु भएको हो। दुर्घटनामा घाइते भएका अन्य पाँच जनाको सोही अस्पतालमा उपचार भइरहेको छ। फरार रहेका बस चालकको प्रहरीले खोजी गरिरहेको छ।
