प्रदेश ५ का मुख्यमन्त्री शंकर पोखरेलले बाहिरी लगानी भित्राउनका लागि स्थानीय लगानीकर्ता नै अग्रसर हुनुपर्ने बताएका छन्।
प्रदेशको आर्थिक मामिला तथा योजना मन्त्रालयले सोमबार आयोजना गरेको सार्वजनिक निजी साझेदारी संवाद कार्यक्रममा बोल्दै मुख्यमन्त्री पोखरेलले निजी क्षेत्रले गर्ने एक अर्ब भन्दा बढी लगानीका योजनामा प्रदेश सरकारले सडक, विद्युत जस्ता भौतिक पूर्वाधार निर्माण गरिदिने बताए।
‘अब सहरकेन्द्रित होइन फराकिलो र सस्तो जग्गा भएको क्षेत्रमा ठूला उद्योग व्यवसाय संचालन गर्नुस्, त्यहाँ जाने सडक, विद्युत जस्ता पूर्वाधार निर्माणको लागि हामी सहयोग गर्न तयार छौँ’ उनले भने।
मुख्यमन्त्री पोखरेलले बुटवल, भैरहवा, बेलहिया, लुम्बिनी, परासी जस्ता करिडोरलाई औद्योगिक क्षेत्रको रुपमा नभई विजनेश हवको रुपमा विकास गर्नुपर्ने बताए। ‘उद्योग संचालनको लागि धेरै जग्गा आवश्यक पर्छ, सहरको नजिक रहेको महँगो क्षेत्रलाई विजनेश हवको रुपमा विकास गरी उद्योग व्यवसायलाई सस्तो ठाउँमा लैजानुपर्छ’ उनले भने।
मुख्यमन्त्री पोखरेलले संघीय सरकारले प्रदेश ५ मा तीनवटा औद्योगिक क्षेत्र निर्माणको लागि जग्गा उपलब्ध गराएको र सातवटा नगरपालिकाले समेत औद्योगिक क्षेत्र निर्माणको लागि प्रकृया अगाडि बढाएको बताए।
उनले प्रदेश ५ लाई ऐतिहासिक र पुरातात्विक सँगै प्राकृतिक, साँस्कृतिक र धार्मिक पर्यटनका रुपले समेत विकास गर्न सकिने उल्लेख गर्दै सो कार्यमा निजी क्षेत्रको सहयोग महत्वपूर्ण हुने बताए।
कार्यक्रममा लगानी बोर्डका कार्यकारी प्रमुख महाप्रसाद अधिकारीले नीतिगत रुपमा स्पष्ट पार्न सके यो क्षेत्रमा लगानीको कमी नहुने बताए। उनले निजी लगानी जोखिमको विषय बनेको भन्दै सरकारले लगानी सुरक्षाको ज्ञारेण्टी गर्नुपर्ने बताए।