आफूले बनाएको बाटोको भुक्तानी नपाएपछि गुल्मीस्थित कालीगण्डकी गाउँपालिका-२ मा एक जनाले सडक नै भत्काइदिएका छन्।
आफ्नो लगानीमा ट्रयाक खोल्ने काम गरिएको र गाउँपालिकाले अहिलेसम्म पनि त्यसको भुक्तानी नगरिदिएको भन्दै निर्माण व्यवसायी तथा उपभोक्ता समितिका कोषाध्यक्ष समेत रहेका कुल प्रसाद न्यौपानेले गत सोमबार सडक भत्काएका हुन्।
चार वर्षअघि उनले बाटो बनाउनको लागि ट्रयाक खोलिदिएका थिए। तर अहिलेसम्म भुक्तानी नदिएको भन्दै उनले बाटो अवरूद्ध गरेका हुन्।
‘चार वर्षअघि दु:ख गरेको बनाएको थिएँ अब डुब्यो,'कुल प्रसादले न्यौपानेले भने,' गाउँपालिकाले अहिलेसम्म भुक्तानी दिएन, त्यसैले बाटो खनेर माटो त्यहीँ थुपारिदिएको हुँ।’
बाटोको हालत त्यस्तो देखेपछि मात्र गाउँपालिका अध्यक्ष वेद बहादुर थापा आफूसँग छलफल गर्ने आएको उनले बताए।
‘सोही दिन गाउँपालिकाका अध्यक्ष वेद बहादुर थापासँग छलफलपछि आयोग गठन गरी बाँकी भुक्तानीको चुक्ता गरिदिने उनले वाचा दिएँ,’ उनले भने।
अध्यक्षले वाचा गरेपछि मंगलबारदेखि काम अगाडि बढेको गाउँपालिकाका उपाध्यक्ष तारा थापाले जानकारी दिइन्।
'कुल प्रसाद न्यौपाने भन्ने व्यक्तिले हाम्रो यो बाटोको पुरानो भुक्तानी बाँकी छ नदिएसम्म सडक सुचारु गर्न दिन्नौं भनेका थिए,'उपाध्यक्ष थापाले भनिन्,'हामीले आयोग गठन गरी छानबिन गरेर बिस्तारै चुक्ता गरिदिने भनेपछि खोलिदिनुभयो।'
१ करोड २२ लाख रुपैयाँ टेन्डरमा अर्बेनीको जिरोदेखि भयकोटको भञ्ज्याङसम्म सात किलोमिटरको बाटोमा अहिले स्तरोन्नतिको काम भइरहेको छ।
कुलप्रासद न्यौपाने लगायतको उपभोक्ता समितिले छुट्टाछुट्टै त्यहाँ ट्रयाक खोलिदिएका थिए। तर अझै भुक्तानी नगरेपछि सडक भत्काएको उनका कान्छा भाइ राम प्रसाद न्यौपानेले बताए।
विभिन्न सडक खण्डमा ट्रयाक खोल्ने काम गरेका उनीसँगै उनका दाइ र अन्यको पनि भुक्तानी हुन बाँकी रहेको न्यौपानेले बताए।
राम प्रसाद न्यौपानेका अनुसार तीन चार खण्डका भुक्तानी हुन बाँकी रहेको छ।
२०७३ सालमा अर्बेनी-भञ्ज्याङकोट सडकखण्डमा काम गरेका कुल प्रसाद न्यौपानेको २० लाख ८० हजार भुक्तानी हुन बाँकी रहेको छ।
राष्ट्रिय दभौखानी पञ्चबली विसाउना खण्डमा ११ देखि १२ लाखसम्म राम प्रसाद न्यौपानेले भुक्तानी लिन बाँकी छ। त्यसको तल्लो सेतीबेनी-अर्बेनी खण्डमा राम प्रसादकै तीन लाख ७० हजार र लक्ष्मी न्यौपानेको चार लाख भुक्तानी बाँकी छ।
विसाउन-भयकोट सडकखण्डमा कासिराम थापा र कर्ण बहादुर थापाको पनि भुक्तानी हुन बाँकी रहेको रामप्रसादले बताए।
'पुरानो गाविसलाई रिङरोड घुमाएर ट्रयाक खोल्ने काम भएको थियो। त्यसमा चार पाँच उपभोक्ता समिति आवद्ध थिए,'रामप्रसाद सेतोपाटीसँग भने,'अहिले स्तरोन्नतिको काम भइरहेको छ।'