राष्ट्रिय योग दिवसका काठमाडौंमा विविध कार्यक्रम गरी मनाइएको छ।
यसै अवसरमा शिक्षा, विज्ञान तथा प्रविधि मन्त्रालयले योग दिवस मनाएको छ।
शिक्षा, विज्ञान तथा प्रविधि मन्त्रालयद्वारा बुधबार राष्ट्रिय योग दिवस, मकर सङ्क्रान्तिका अवसरमा आयोजित कार्यक्रममा शिक्षा, विज्ञान तथा प्रविधिमन्त्री गिरिराजमणि पोखरेल, परराष्ट्रमन्त्री प्रदीपकुमार ज्ञवाली, स्वास्थ्य तथा जनसंख्यामन्त्री भानुुभक्त ढकाललगायतले योग अभ्यास गरेका छन्।
उनीहरूले कुर्ची मै बसेर योग अभ्यास गरेका थिए।
कार्यक्रममा सम्बोधन गर्दै परराष्ट्रमन्त्री प्रदीपकुमार ज्ञवालीले योग शिक्षा गौरवपूर्ण परम्परा र सम्पदा भएको बताए।
विज्ञान र प्रविधिको विकास नहुँदा योगको विकास भएको बताउँदै ज्ञवालीले यो गौरवपूर्ण परम्परा र सम्पदा भएको बताए।
‘आधुनिक विज्ञान, प्रविधि नभएको बेला, आधुनिक मेडिकल विज्ञानको विकास भएको थिएन। जतिबेला डाइन्गोष्टिक र ट्रिटमेण्डका लागि अहिलेजस्तो सहज सुलभ प्रविधिहरू थिएनन्। हाम्रा अग्रजहरूले योगका माध्यमबाट स्वस्थ जीवन बाँच्ने र अरु धेरै महत्वपूर्ण सम्पदा र ज्ञानहरू हस्तान्तरण गरेर गए’, उनले भने, ‘विभिन्न किसिमका तनावलाई ध्यानले कम गर्न सक्छ। प्रभावकारी छ। यो गौरवपूर्ण धरोहरलाई विद्यालय शिक्षासँगै जोडेर जीवनको अभिन्न अंग बनाउनुपर्छ।’
स्वास्थ्य तथा जनसंख्यामन्त्री भानुभक्त ढकालले योगको माध्यमबाट मान्छेमा सकारात्मक भावनाको विकास हुने बताए। ‘मान्छेमा योगको माध्यमबाट सकारात्मक भावनाको विकास गर्न सकियो भने आत्महत्या जस्ता घटनाहरू न्यूनिकरण गर्न सकिन्छ’, ढकालले भने।
शिक्षा, विज्ञान तथा प्रविधिमन्त्री गिरिराजमणि पोखरेलले योगलाई औषधि र उपचारको अर्थमा मात्रै नभएर जीवन पद्धतिको रूपमा बुझ्नुपर्ने बताए।
योग दिवसका अवसरमा एक दिन कार्यक्रम गरेर मात्रै नहुने बताउँदै उनले यसलाई जनजनमा पुर्याउन अभियान नै चलाउनुपर्ने बताए।
योग र प्राकृतिक चिकित्सालाई पाठ्यक्रममा समावेश गर्ने योजना सरकारको रहेको उनले बताए।
राष्ट्रिय एकता : योगको सान्दर्भिकता नारासहित बुधबार योग दिवस मनाइएको छ।
सबै तस्बिर : रासस