धनुषाको क्षिरेश्वरनाथ नगरपालिका वडा नम्बर ५ महेन्द्रनगरमा गए राति बम बिस्फोट हुँदा एक प्रहरी निरीक्षकसहित तीन जनाको मृत्यु भएको छ।
घटनामा एकाघरका बाबु राजेश साह, उनका छोरा आनन्द र प्रहरी निरीक्षक अमिर दाहालको मृत्यु भएको हो।
बिस्फोटमा परेर राजेशका अर्का छोरा प्रकाश, छोरी अञ्जली र प्रहरी जवान रिजनाथ कुमार महतो घाइते छन्। उनीहरूको उपचार भइराखेको छ।
घटनाका एक प्रत्यक्षदर्शीसमेत रहेका राजेशका छिमेकी मनोज साहले सेतोपाटीसँगको कुराकानीमा प्रहरीको हेलचक्राइँले घटना घटेको उल्लेख गरे।
उनले घटनाबारे सेतोपाटीकर्मी नेहा झासँग गरेको कुराकानीको सम्पादित अंश:
हिजो (शुक्रबार) पानी परिराखेको थियो। आठ बजेदेखि उता धेरैपटक बत्ति आउने जाने गर्यो। किन थाहा भएन।
म सुतिराखेको थिएँ।
करिब ११ बजेको हुँदो हो। भयंकर आवाज आयो। मेरो घर हल्लियो। भूकम्प गयो कि जस्तो पनि लाग्यो। तर पानी परिराखेकोले चट्याङ परेको होला भन्ने भो।
आवाज आएको एकैछिनमा रूवाबासी सुरू भयो। के भयो भनेर म घर बाहिर निस्किएँ।
राजेशकी श्रीमती रूँदै थिइन्। मैले दुई जना पुलिस भुइँमा ढलेको देखें। चट्याङले हो कि भनेको त होइन रहेछ।
राजेशकी श्रीमतीले बम पड्कियो भनिन्। घटनास्थल क्षतविक्षत अवस्थामा थियो। एकाछेउमा राजेशका जेठा छोरा आनन्द साह छटपटाउँदै थिए। उनलाई समयमै उपचार गर्न सकेको भए बचाउन सकिन्थ्यो।
गाडी, एम्बुलेन्स खोज्दैमा ४५ मिनेट ढिला भयो। उनलाई बचाउन सकिएन।
घटना के भएको थियो त?
पिसाव गर्न राजेशकी श्रीमती शौचालय जान लाग्दा घरको गेटमा झोला झुण्डिएको देखिछन्। शौचालय नगई उनले राजेशलाई गेटमा झोला छ भनेकी रहिछन्।
यो घटना शुक्रबार बेलुकी करिब ११ बजेतिरको हो।
राजेशले पनि गेटमा झोला देखेपछि छोराछोरीलाई अर्को बाटोबाट घर बाहिर ल्याएका थिए।
उनीहरूले शंकास्पद झोलाबारे प्रहरीलाई खबर गरे।
केहीबेरमा गाडी चढेर प्रहरी निरीक्षकसहितको टोली राजेशको घरमा आइपुगे।
‘इन्स्पेक्टरले हतारहतार गेट खोल्दा बम पड्कियो,’ राजेशकी श्रीमतीलाई उद्धृत गर्दै मनोजले भने, ‘यहाँ केही छैन, हामी हेर्छौं भन्दै प्रहरीले झोला छोएको थियो।’
राजेशको घरमा कसले किन बम राखेको भन्ने खुलेको छैन। प्रहरीले घटनामा संलग्नलाई खोजी सुरू गरेको जनाएको छ।
यो पनि:
धनुषामा बम विस्फोट गराएको आशंका तीन जना पक्राउ
धनुषा बम विस्फोटः उपचारका क्रममा प्रहरी निरीक्षक अमिर दाहालको मृत्यु
