फिलिपिन्सका विद्यार्थीले प्राथमिक, उच्च विद्यालय र कलेजबाट ग्राजुएट हुन कम्तिमा दस वटा रूख रोप्नुपर्ने कानुन पास गरेको छ।
सिएनएनका अनुसार फिलिपिन्स सरकारले आधिकारिक रुपमा पारित गरेको नयाँ विधेयकमा प्राथमिक विद्यालय, उच्च माध्यमिक विद्यालय र कलेजका सबै विद्यार्थीले रूख रोप्नुपर्ने उल्लेख छ।
विधेयकका अनुसार विद्यार्थीले रुखहरू जंगल, सहरी क्षेत्र, प्रयोगमा नआएका खानी उत्खनन् क्षेत्र वा आदिवासी क्षेत्रमा रोप्न सक्नेछन्। त्यस्तै रूख रोपिने क्षेत्र मौसमका लागि पनि उपयुक्त हुनुपर्नेछ। विशेषगरी स्वदेशी प्रजातिका रूखलाई प्राथमिकता दिइनेछ।
‘पर्यावरण ऐन २०१६ को लागि ग्राजुएसन लिगेसी’ विधेयकलाई पेश गरेका ग्यारी एलेजानोले भनेका छन्, ‘हामीले सन्तुलित र स्वस्थ परिस्थितिका लागि युवाको अधिकारलाई मान्यता दिए पनि यसलाई वास्तविकता बन्ने सुनिश्चित गर्न उनीहरूलाई योगदान दिन लगाउनु नपर्ने कुनै कारण छैन।’
यो पहल अन्तर्गत बर्सेनि कम्तिमा दुइ अर्ब रुख रोपिनेछन् जसमा एक पुस्ताको क्रममा कूल ६ अर्ब रुख थप हुने एलेजानोले जोड दिए।
उनले थपे, ‘यी रुख विद्यार्थीको वातावरण र भविष्यका पुस्ताहरुका लागि जीवित विरासत बन्नेछन्।’