पूर्वप्रधान्यायाधीश सुशीला कार्कीले सीमा विवादको कुरालाई वेवास्ता गर्ने हो भने थप भूभाग कब्जा हुने खतरा रहेको औंल्याएकी छन्।
बुधबार लिम्पियाधुरासम्म नेपालको सीमा कायम गर्न माग गर्दै सीमा बचाउ अभियानमा सहभागी पूर्वप्रधान्यायाधीश कार्कीसहितका अगुवाहरूले भूमि व्यवस्था, सहकारी तथा गरिवी निवारण मन्त्रालयमा पुगी मन्त्रीलाई ज्ञापनपत्रसहित नक्सा हस्तान्तरण गरेका थिए।
सोही क्रममा उनले भनिन्,‘छिमेकीले हामीलाई हेर्ने भन्ने कुरा होला तर यति सानो मुलुकको ह्याकुलो-ह्याकुलो भेटिएको ठाउँ अरुले नै लिइदिने हो भने हाम्रो अस्तित्व नै के रह्यो र!’
सीमाको कुरामा सरकार पहिल्यैबाट गम्भीर हुन नसकेको उनले बताइन्।
सुगौली सन्धिमै काली नदी नेपालको सीमा रहेको बताउँदै उनले भनिन्, ‘हामी गीत नै गाउँछौं पूर्वमा मेची पश्चिमा महाकाली। तर पहिल्यैबाट वेवास्ता गर्दा हामीले आफ्नो जमिन कब्जा गरेर राख्न सकेनौं।’
आफूले सीमा स्तम्भमै धानको बाला देखिएको भन्दै उनले यो कुरालाई स्पष्ट गर्नुपर्ने बताइन्।
पूर्वप्रधानन्यायाधीश कार्कीले सबभन्दा पहिला सीमा अकुपाई गरेर नेपालले आफ्नो प्रभुत्व देखाउनुपर्नेसमेत बताइन्।
सीमा बचाऊ अभियानका तर्फबाट ध्यानाकर्षण पत्र बुझ्दै सीमा सुरक्षाको सन्दर्भमा सरकार कटिबद्ध रहेको मन्त्री पद्माकुमारी अर्यालले बताइन्।
लिपुलेक र कालापानीका बारेमा आवश्यक पहल भइरहेको र लिम्पियाधुराका बारेमा प्रमाण जुटाएर अघि बढ्ने सोचमा सरकार रहेको बताइन्।