बिहे गर्ने आश्वासन दिएर युवतीलाई करणी गरेको आरोपमा ओखलढुंगाका एक प्रहरी जवान पक्राउ परेका छन्। अस्थायी प्रहरी चौकी श्रीचौरमा कार्यरत जवान प्रकाशकुमार यादवलाई प्रहरीले पक्राउ गरेको हो।
पक्राउ परेका यादवलाई बिहीबार अदालतबाट म्याद थप गरी अनुसन्धान थालिएको ओखलढुंगा प्रहरीले जनायो। प्रहरी नायब उपरीक्षक पुष्पराज मल्लका अनुसार गत मंगलबार जंगलमा घाँस काट्न गएकी ती १८ वर्षीया युवतीलाई करणी गरेको आरोप लागेको थियो। घटना खुलेपछि यादवलाई पक्राउ गर्न भनी बुधबार स्थानीयले चौकी नै घेराउ गरेका थिए।
‘अहिले घटनाबारे अनुसन्धान भइरहेको छ। स्वास्थ्य परीक्षण गरी युवतीलाई आफन्तको जिम्मा लगाइएको छ,’ मल्लले भने।
सहमतिमै शारीरिक सम्पर्क भएकोमा युवतीका आफन्तले घटना बाहिर ल्याएको आरोप प्रहरीको छ।