उच्च सरकारी वकिल कार्यालय पाटनले रूकुमकी सिस्ने हिमाल (परिवर्तित नाम)को बेचविखनमा संलग्न भक्ते परियार, टोपराज अधिकारी र कल्पना सार्कीमाथि अनुसन्धान तथा आवश्यक कारबाही गर्न लेखि पठाएको छ।
सोमबार तीन जनालाई पक्राउ गरी मुद्दा चलाउन माग गर्दै सिस्ने हिमालले निवेदन दिएकी थिइन्। मंगलबार काठमाडौं प्रहरीलाई सिस्ने हिमालको निवेदन उपर आवश्यक कारबाही गर्न लेखि पठाएको उच्च सरकारी वकिल कार्यालय पाटनका प्रमुख सहन्यायाधिवक्ता लोकराज पराजुलीले बताए।
‘आफ्नो बेचविखनमा संलग्न भएकाले उनीहरूलाई मुद्दा चलाइ पाउँ भनेर पीडितले निवेदन दिनुभएको थियो,’ उनले सेतोपाटीसँग भने, ‘निवेदनमाथि अनुसन्धान लगायतका आवश्यक कारबाही गर्न भनेर काठमाडौं प्रहरीलाई पठाएका छौं।’
सिस्ने हिमालले आफूलाई बेचविखन गरेको भन्दै ती तीनजनासहित ६ जनाविरूद्ध ४ वर्ष अघि जाहेरी दिएकी थिइन्। तर जिल्ला सरकारी वकिल कार्यालय काठमाडौंले काठमाडौंका श्याम डंगोल, सुनिता मुरमुर र सिस्ने हिमालका देवर पर्ने रूकुमकै ज्ञानेन्द्र चनरालाई मुद्दा लगायो। परियार, अधिकारी र सार्कीविरूद्ध ठेगाना नमिलेको भन्दै मुद्दा चलाएन।
त्यो मुद्दामा पनि जिल्ला अदालत काठमाडौंले डंगोललाई मात्र १० वर्ष कैद, ५० हजार जरिवाना र ५० हजार नै क्षतिपूर्ति दिनुपर्ने फैसला गरेको थियो। चनरा र मुरमुरलाई सफाइ दिएको थियो।
उक्त फैसला विरूद्ध सरकारी वकिल कार्यालयले उच्च अदालत पाटनमा पुनरावेदन गरेको थियो। पुनरावेदनमाथि सुनुवाई गर्दै न्यायाधीश यज्ञराज भट्ट र टेकनारायण कुँवरको इजलासले डंगोल, मुरमुर र चनरालाई जनही २० वर्ष कैद, २ लाख जरिवाना र २ लाख नै क्षतिपूर्ति भराउने फैसला गरेको थियो।
फैसला पछि सिस्ने हिमालले सरकारी वकिल कार्यालयमा गएर बाँकी तीनजनालाई पनि पक्राउ गरि मुद्दा चलाउन निवेदन दिएकी थिइन्। २०७१ साल वैशाख १ गते ज्ञानेन्द्र, सुनिता र श्याम डंगोलले उनलाई रूकुमबाट काठमाडौं ल्याएर विराटनगर काँकडभिट्टा हुँदै भारत पुर्याएका थिए। पाँच दिनपछि भारतको कलकत्ताबाट दुबई हुँदै सिरिया पुर्याएर उनलाई बेचिएको थियो।
सिस्ने हिमाललाई डंगोलले कम्पनीमा काम लगाइदिने लोभ देखाएका थिए। डंगोललाई भने सिस्नेका देवर पर्ने ज्ञानेन्द्र चनराले भेटाएका थिए। सिस्ने हिमाललाई कलकत्ता पुर्याएर उनीहरूले भक्ते परियार र टोपराज अधिकारीको जिम्मा लगाएका थिए।
ती दुवैले सिस्ने हिमालसहित ५ जना केटीलाई कलकत्तादेखि दुबई पठाए। त्यहाँबाट उनीहरूकै च्यानलका एक व्यक्तिले सिरिया पठाएका थिए।
सिरिया पठाएपछि मात्र आफूलाई ७ हजार अमेरिकी डलरमा बेचिएको थाहा पाएको सिस्ने हिमालले अदालतमा बयान दिएकी थिइन्। सिरियामा भएको यो समूहको अफिसले उनलाई एउटा घरमा काम गर्न भन्दै पठाएको थियो।
त्यहाँ आफूलाई खान नदिने, यौन शोषण गर्ने, कुटपिट गर्ने, काम गरेको पैसा नदिनेलगायतका शोषण गरेको सिस्ने हिमालले अदालतसमक्ष बयान दिएकी थिइन्। तीन महिना काम गरेपछि उनी बिरामी परिन्। त्यो परिवारले उनलाई अफिस फर्काइदिएको थियो। त्यो अफिसका कर्मचारीले आफूलाई दिनदिनै यातना दिने गरेको सिस्ने हिमालले बताइन्।
सिरियाको दमासकसस्थित उक्त अफिसमा दुई महिना बसेपछि उनले लुकेर परिवारसँग सम्पर्क गरेकी थिइन्। परिवारले अफिसमा दुई लाख पैसा पठाइदिएपछि उनलाई फर्काइएको थियो।
ज्ञानेन्द्र, श्याम डंगोल, सुनिता मुरमुर, भक्ते परियार, टोपराज अधिकारी र कल्पना भन्ने एक महिलाले मिलिजुली बेचेको भन्दै पीडितले फर्केर आएलगत्तै जाहेरी दिएकी थिइन्।
सुरूमा प्रहरीले उनको जाहेरी लिएन। चार महिनापछि विभिन्न संघसंस्थाको सहयोगमा बल्ल उनले प्रहरीमा जाहेरी दर्ता गराउन सफल भइन्। जाहेरी दर्ता भएको एक वर्षपछि ज्ञानेन्द्रलाई प्रहरीले पक्राउ गरेको थियो। त्यसपछि श्याम र सुनितालाई पक्राउ गर्यो।
प्रहरीले सबैविरूद्ध मुद्दा लगे पनि सरकारी वकिलले भने भक्ते परियार, टोपराज अधिकारी र कल्पनालाई फरार रहेको र ठेगाना नमिलेको भन्दै मुद्दा चलाएन। जबकी सिस्ने हिमालले सिरियाको अफिसबाट फेला पारेर ल्याएको ६ जनाकै ठेगाना र पासपोर्टको फोटोकपी प्रहरीलाई बुझाएकी थिइन्।
सिस्ने हिमालले प्रहरीमा उजुरी दिएपछि ज्ञानेन्द्र र श्यामको समूहले उनलाई मुद्दा फिर्ता लिन धम्की दिएका थिए।सिस्ने हिमाल एक वर्षदेखि काठमाडौंमा छिन्। ज्ञानेन्द्रलाई अदालतले छोडिदिएपछि उनले ज्यानमार्नेसम्मका धम्की दिएकाले घर छोड्नुपरेको उनले बताइन्।
‘उनीहरूले मलाई नसकेपछि छोरीलाई मार्ने धम्की दिए अनि मैले घर छोड्नु पर्यो,’ सिस्ने हिमालले सेतोपाटीसँग भनिन्, ‘मुद्दा काठमाडौंमै भएकाले म यहीँ आएकी हुँ।’
