झापाको मेचीनगर-१४ का सुफल हस्दा (सतार) वैशाखीको सहाराले हिँड्थे। गाडी दुर्घटनामा परी दाहिने खुट्टा गुमाएका सुफलको परिवारका दिनभरि काम नगरे बिहान-बेलुका हातमुख जोड्न धौधौ हुन्थ्यो। एक खुट्टाको भरमा उनी दिनभर खेतमा आली लगाउने, बीउ काढ्ने, घर निर्माणमा इँटा सिमेन्ट जोड्नेलगायतका मजदुरी काम गर्थे।
असार २७ गते आएको बाढीले सुफललाई बगायो। कहाँ पुर्यायो थाहा छैन।
मेचीनगर–१४ का अध्यक्ष शङ्कर पोखरेलले गाउँले, आफन्त र प्रहरी मिलेर खोज्दा सुफलको सास वा लाश केही फेला नपरेको बताए। खोलाले बगाउँदै गरेको देख्नेहरू भएको हुँदा सुफल जीवित भेटिने आशा नभएको वडाध्यक्ष पोखरेलले बताए।
बेपत्ता सुफलकी पत्नी तलामी हस्दाले प्रहरी चौकी चारआली र मेचीनगर नगरपालिका–१४ को कार्यालयमा खोजीकार्य गरिदिन निवेदन दिएकी छन्। फुलबासाखोलाको डिलमा छाप्रे घर भएका सुफलको पत्नी, एक छोरी र दुई छोरा छन्।
खोलाले बगाएको भोलिपल्ट घरैमा आएर नगरप्रमुख विमल आचार्य र उपप्रमुख मीना उप्रेतीले खोजबिन गर्न दुई हजार नगद सहयोग दिएको बेपत्ता सुफलका वयोवद्ध बुबा चरण हस्दाले बताए।
नेपाल रेडक्रस सोसाइटी झापाका अध्यक्ष लोकराज ढकालले प्रहरीले बेपत्ताको मुचुल्का प्रमाणित गरेर नगरपालिकाको प्रक्रिया पूरा भएपछि बेपत्ता परिवारले सरकारी राहत पाउने बताए।
असार अन्तिम साताको अविरल वर्षापछि आएको बाढीपहिरोमा परी ज्यान गुमाउनेको संख्या ९० पुगेको छ।
बिहीबार बिहान १० बजेसम्म नेपाल प्रहरीले दिएको विवरण अनुसार बाढीपहिरोमा परी २९ बेपत्ता र ४१ घाइते छन्।
तीन हजार ३६६ भन्दा बढीको उद्दार गरिएको नेपाल प्रहरी जनाएको छ।
