अविरल वर्षापछि आएको बाढीपहिरोले क्षति पुर्याएका देशका विभिन्न राजमार्गहरु एकतर्फी सञ्चालनमा आएका छन्।
महोत्तरीको बर्दिबासस्थित महेन्द्र राजमार्गमा भप्सीको पुल बाढीले भत्काएपछि अबरुद्ध भएको सडक पनि एकतर्फी खुलेको छ। भत्केको पुलमा डाइभर्सनबाट एकतर्फी सडक खुलाइएपछि सवारी साधन चल्न थालेका छन्।
राजमार्गमा रोकिएका सवारी साधन बर्दिवास–औरही–गौशाला–माईस्थान हुँदै सञ्चालन भएको छ। सिन्धुलीको गलजोर गाउँपालिका र सुनकोशी गाउँपालिकामा पहिरोले क्षति पुगेको बिपी राजमार्ग पनि एकतर्फी सञ्चालनमा आएको छ।
पाल्पा सिद्धबाबा क्षेत्रमा पहिरो खसेर अवरुद्ध सिद्धार्थ राजमार्ग आइतबार एकतर्फी सञ्चालनमा आएको छ। मकवानपुर फाँखेल हुँदै कुलेखानी सडक र मध्यपहाडी लोकमार्ग खुर्कोटउदयपुर सडक खण्डका विभिन्न ठाउँ भने पहिरो हटाउन नसक्दा पूर्ण सञ्चालनमा आउन सकेको छैन।
त्रिभुवन राजपथ र पृथ्वीराजमार्ग भने पूर्ण रुपमा सञ्चालनमा रहेको प्रहरीले जानकारी दिएको छ।
