चिप्लिएको यति एयरलाइन्सको जहाज धावनमार्गमा ल्याइएको छ।
बिहान ११ बजेतिर जहाज चिप्लिएर धावनमार्गको दक्षिणतिरको घाँसे मैदानमा पुगेको थियो। विमानस्थलका प्रवक्ता प्रताव तिवारीले सो जहाजलाई धावनमार्गबाट ह्याङ्गरमा लैजाने काम भइरहेको र केही बेरमा विमानस्थल सामान्य अवस्थामा फर्किने जानकारी दिए।
बिहान जहाज अवतरणको क्रममा धावनमार्गबाट चिप्लिएपछि त्रिभुवन अन्तर्राष्ट्रिय विमानस्थलमा उडान अवतरण ठप्प भएको छ।
विमानस्थल बन्द हुँदा अहिलेसम्म सबै आन्तरिक उडान रोकिएका छन्। त्यस्तै एक दर्जन अन्तर्राष्ट्रिय उडान डाइभर्ट भएका छन्।
विमानस्थल कार्यालयका अनुसार कतार एयरवेजको जहाज कोलकत्ता, सिचुवान एयरलाइन्सको ल्हासा, चाइना साउदर्नको कोलकत्ता, विमान बंगलादेशको ढाका, थाई एयरवेजको बैंकक, नेपाल एयरलाइन्सको नयाँ दिल्ली, मालिन्दो एयरको ढाका, इन्डिगो एयरलाइन्सका उडान डाइभर्ट भएका छन्।
