इटहरी उपमहानगरको बजार अनुगमन टोलीले ४० कार्टुन आँप नियन्त्रणमा लिएको छ। बजार अनुगमन गर्दा आइतबारेमा सञ्चालित रामनारायण फ्रुट सेन्टरमा विषादी प्रयोग गरेर पकाएको आँप भेटिएपछि नियन्त्रणमा लिइएको हो।
अनुगमन गर्दा आँप प्याक गरिएको कार्टुनमा सेतो कागजमा सानो पोको भेटिएको थियो। त्यो पोको खोलेर हेर्दा सेतो धुलो भेटिएपछि विषादी (कार्वाइड) भएको पत्ता लागेको हो। कार्वाइड नेपालमा प्रतिबन्धित छ।
खाद्य विज्ञ केपी लम्सालका अनुसार कार्वाइड प्रयोग गरिएको आँप खाँदा पाचन प्रणालीमा असर पर्छ। लम्सालले आँखा र छालामा पनि विषादी मिसिएका आँपले असर पार्ने बताए।
कार्वाइड प्रयोग गरेर पकाइएको आँप हेर्दा पहेंलो, लोभलाग्दो र आकर्षक देखिने भए पनि मानव स्वास्थ्यका लागि हानिकारक रहेको लम्साल बताउँछन्।
कार्वाइड हालेर पकाइएको आँपको रंग, स्वाद र वास्ना पनि विकास भएको हुँदैन। कार्वाइडबाट ग्यास निस्कन्छ, जसले आँप पकाउन मद्दत गर्छ। खाद्य ऐन २०२३ को दफा ५ उपदफा ३ मा कार्वाइड प्रयोग गरेमा सात महिनादेखि एक वर्षसम्म कैद र पाँचदेखि दस हजार रुपैयाँसम्म जरिवाना वा दुबै सजाय हुने व्यवस्था छ।