बहुविवाह मुद्दामा फरार भएकी एक महिलालाई प्रहरीले पक्राउ गरेको छ। हेटौंडा हटिया ९ की रिता भन्ने हिरा चौलागाइलाई सिआइबीले काठमाडौंको कपनबाट पक्राउ गरेको हो।
उनले २०६६ सालमा स्थानीय ठाकुर प्रसाद चौलागाइँसँग भागेर विवाह गरेकी थिइन् ।
चौलागाईँको जेठी श्रीमतीले प्रहरीमा उजुरी दिएपछि उनीहरुविरुद्ध मुद्दा चलाइएको थियो। सो क्रममा उच्च अदालत पाटन हेटौंडाले उनलाई २ वर्ष कैद र १५ हजार जरिवाना तोकेको थियो।
चौलागाईँको जेठी श्रीमती हुदाँहुदै कान्छी बन्नका लागि उनी जानी जानी विवाह गरेपछि फरार भएकी उनलाई खोजतलास गर्ने क्रममा कपनबाट पक्राउ गरिएको सिआइबीका एसपी दीपक रेग्मीले बताए। अदालतको आदेशले कैद भुक्तानको लागि उनलाई कारागार कार्यालय जगन्नाथदेवल काठमाडौंमा पठाईएको सिआइबीले जनाएको छ।
