कसैले चलेको कम्पनीको नाम लिएर कुनै काम गरिदिन्छु भन्यो भने तपाईंमा तत्कालै विश्वास गर्ने बानी त छैन ?
यदि यस्तो गर्नुभएको भए सावधान हुनुस् र कुनै कम्पनीको कर्मचारी बनेर सेवा उपलब्ध गराउँछु भन्ने मान्छे यकिन नगरी उसलाई काम नदिनुस्।
त्यस्ता व्यक्ति सम्बन्धित कम्पनीको कर्मचारी हो या होइन पहिले प्रष्ट भएर मात्र काम लगाउनुस्। नत्र ठगिन सक्नुहुन्छ। यस्तै घटना हालै काठमाडौंमा भएको छ।
इन्टरनेट सेवा प्रदायक कम्पनी वर्ल्ड लिंकको कर्मचारी हुँ भन्दै एक व्यक्तिले झण्डै १५ जनालाई ठगेको फेला परेको छ।
प्रहरीको महानगरीय अपराध महाशाखाले उक्त कम्पनीका पूर्वकर्मचारी काभ्रेपलाञ्चोक घर भइ काठमाडौं महानगरपालिका ठमेल बस्ने १८ वर्षीय नीरज कुइँकेललाई पक्राउ गरेपछि सो रहस्य खुलेको हो।
उनले सुशान्त ओझाको नामबाट ठगी गर्दै आएका थिए। कम्पनीको मोबाइल र परिचयपत्र दुरुपयोग गरेर काठमाडौंका विभिन्न स्थानमा गइ इन्टरनेट जोड्ने, रकम असुली गर्ने, पैसा नदिए लाइन काट्नेलगायत कार्य उनले गर्दै आएका थिए।
यस्तो गतिविधिको सूचनाप्राप्त हुनासाथ टेकुस्थित महानगरीय अपराध महाशाखाबाट खटिएको प्रहरीले उनलाई वसुन्धराबाट बुधबार पक्राउ गरी अनुसन्धान थालेको छ।
गत माघदेखि काम छाडेका उनले सोही कम्पनीको कर्मचारी बनेर १५ भन्दा बढी पुराना ग्राहक र केही नयाँ ग्राहक बनाइ रु ६५ हजार संकलन गरेको अनुसन्धानमा खुलेको छ।
अहिले महाशाखाले अदालतबाट म्याद थप गराएर उनीबारे थप अनुसन्धान गरिरहेको जनाएको छ।
काठमाडौं महानगरीय प्रहरी परिसरका प्रवक्ता होवीन्द्र बोगटीले सक्कली सुन भनेर नक्कली सुन दिने सक्कली पैसा भनेर नक्कली पैसा दिने गिरोहसमेत सक्रिय भएकाले यसतर्फसमेत सचेत हुन सबैमा अनुरोध गरेका छन्।