सडक डिभिजन कार्यालय लहान सिरहाले सडक तथा पुल निर्माणको काम समयमा पूरा नगर्ने निर्माण कम्पनीमाथि कारबाही गरेको छ।
सिरहासहित सप्तरी र उदयपुर जिल्लामा निर्माणाधीन सडक तथा पुल निर्माणको सम्झौता गरे पनि समयमा काम सम्पन्न नगर्ने आठ निर्माणसँग सम्बन्धित कम्पनीमाथि कारबाही गरिएको सडक डिभिजन कार्यालय लहानका प्रमुख वीरेन्द्रकुमार साहले जानकारी दिए।
सम्झौताबमोजिम ठेक्काको काम सुरू नै नगरेको तथा कार्य सुरू भए पनि सन्तोषजनक प्रगति नदेखिएकाले मौखिक पत्र तथा सूचनामार्फत् पटकपटक जानकारी गराउँदासमेत कार्य सुरू गर्नेतर्फ पहल नथालेपछि कारबाही सुरू गरिएको प्रमुख साहको भनाइ छ।
सप्तरीको गिदेरी खोला पुल र महुली घाडन खोला पुलको ठेक्का लिएको पप्पु मृत सञ्जिवनी जेभी काठमाडौंमाथि कारबाही गरी दुवै ठेक्काबाट रु दुई करोड १८ लाख ७० रकम फिर्ता गराइएको छ भने सप्तरीको मुतनी खोला र सिरहाको सरस्वती खोलामा पुल निर्माणको ठेक्का लिएको रोशन कन्स्ट्रक्सन जनकपुरमाथि कारबाही गरी रु ५९ लाख ७० हजार फिर्ता गराइएको छ।
सप्तरीको सुमन्दरी खोलामा पुल निर्माणको ठेक्का लिएको नीलगिरी निर्माण सेवा प्रालि बानेश्वर काठमाडौंमाथि समेत कारबाही गरी रु ४७ लाख ५० हजार रकम फिर्ता गराएको कार्यालय प्रमुख साहले बताए। त्यस्तै अन्य तीन ठेक्काका ठेकेदारमाथि समेत कारबाही गरी रकम फिर्ताका लागि बैंकमा पत्र काटिएको जनाइएको छ।
कम प्रतिस्पर्धामा ठेक्का लिएर लामो समयसम्म काम सुरू नगर्ने र गुणस्तरहीन काम गर्ने प्रवृत्ति बढेकाले त्यस्ता निर्माण कम्पनीमाथि निगरानी बढाइएको प्रमुख साहको भनाइ छ। (रासस)
