गाउँपालिकाको केन्द्र सारिएको विरोधमा मंगलबार फाल्गुनन्द गाउँपालिकाको कार्यालयमा तालाबन्दी गरिएको छ।
सोमबारको गाउँसभाको निर्णयले फाल्गुनन्द ५ को याम्फाबुङ र कोल्बुङको बीचमा केन्द्र राख्नका लागि जग्गा प्राप्तिको प्रक्रिया अघि बढाउने निर्णय गरेको थियो।
गाउँसभाको निर्णयपछि आन्दोलनमा उत्रिएका स्थानीयबीच विवाद समाधानका लागि मंगलबार छलफल भइरहेको प्रमुख प्रशासकीय अधिकृत अनिल त्रिखत्रीले बताए ।
भौतिक पूर्वाधारको असुविधा भएको, अपायक पर्ने ठाउँमा पालिका सारिएको भन्दै स्थानीयले विरोध प्रदर्शन गरेका हुन्। उनीहरूले अहिले भएको स्थान घुर्बिसे पञ्चमीमा नै गाउँपालिका राख्नुपर्ने भन्दै आन्दोलन गरेका छन् ।
आन्दोलनमा उत्रिएका स्थानीयवासीले पञ्चमी बजार तथा स्थानीय शिक्षण संस्थाहरू बन्द गराएका छन्।
पञ्चमीमा केन्द्र नराखिए जस्तोसुकै आन्दोलन गर्न पछि नपर्ने स्थानीय डि.एम आङदेम्वेले बताए ।
अघिल्लो वर्ष अघि केन्द्र सार्ने विषयमा मतदान हुँदा कोल्बुङ केन्द्रको पक्षमा १९ र पञ्चमी केन्द्रको पक्षमा १८ मत परेको थियो । त्यसपछि तत्कालीन संघीय मामिला तथा स्थानीय विकास मन्त्रालयमा मुद्दा परेपछि कुनै पनि निर्णय नगर्न भन्दै मुद्दा बदर भएको थियो भने उच्च अदालत इलाममा परेको मुद्दा पनि खारेज भएपछि घुर्बिसे पञ्चमीबाटै कार्य सञ्चालन भइरहेको थियो ।
गाउँसभाको निर्णय आफूहरूलाई मान्य नहुने भन्दै स्थानीयहरूले पालिकाका सबै निकायहरूमा ताला लगाएर कामकाज ठप्प बनाएपछि सेवाग्राही मारमा परेका छन्।
स्थानीय देविचन्द्र आङदेम्वेको नेतृत्वमा आन्दोलन समिति नै बनाएर स्थानीयहरूले बिहानैदेखि सडकमा टायर बाल्नुका साथै गाउँपालिकाका विषयगत कार्यालयसहित कर्मचारीका आवासमा समेत ताला लगाएको बताइएको छ ।
आन्दोलनका कारण फाल्गुनन्द ५ घुर्विसे पञ्चमीस्थित घुर्विसे पञ्चमी मावि, शान्ति वाल विकास मावि , छाला सुकुवा इङ्लिस बोर्डिङ स्कुल र सीमाना जोडिएको इलाम फाकफोकथुम १ स्थित सिध्दबाबा आवासीय मावि बन्द हुँदा त्यहाँ अध्ययनरत करिब १४ सय बालबालिकाको पठन पाठन प्रभावित भएको छ ।
