मध्यकालीन फ्रान्सको वैभवका रूपमा रहेको नोट्र ड्याम अर्थात् आवर लेडी अफ पेरिस गत सोमबार राती लागेको आगोले लगभग खरानी भएको छ।
युनेस्कोको विश्व सम्पदामा सूचीकृत नोट्र ड्याममा सोमबार साँझ स्थानीय समयअनुसार पौने सात बजे आगो लागेको थियो। फ्रान्सको गोथिक आर्किटेक्चरको नमूनामा मानिने उक्त क्याथोलिक क्याथेड्रल ८ सय वर्ष पुरानो हो।
यो बनाउन एक सय वर्ष लागेको थियो। सन् ११६० मा काम सुरू गरेर १२६० मा तयार भएको। आफ्नो सम्पदा जलेको देख्दा हजारौं पेरिसवासीका आँखा रसाएका थिए।
तर आगलागी हुनुअघि नै बिहीबार यहाँबाट १६ वटा ठूला मूर्ति झिकिएका थिए। भवन माथिबाट क्रेनले तानेर यी मूर्ति निकालिएका थिए।
झण्डै सय वर्षपछि मर्मतसम्भारका निम्ति ती मूर्ति निकालिएको अन्तर्राष्ट्रिय सञ्चारमाध्यमले जनाएका छन्। यहाँ केही वर्षदेखि जिर्णोद्धारको काम चलिरहेको थियो।
अघिल्लो साताको बिहीबार करिब एक सय मिटर अग्लो क्रेने १६ वटा तामाका मूर्ति त्यहाँबाट निकालेको थियो।
यी मूर्ति दस फिटभन्दा कम उचाइका थिए। तामाका भए पनि फोहोर भएर हरिया भइसकेका बहुमूल्य मूर्ति सरसफाइ र मर्मतका निम्ति ट्रकमा हालेर वर्कसपसम्म लगिएका थिए। यी मूर्ति सन् १८५९ र १८६० मा क्याथेड्रल पुनर्निर्माण क्रममा राखिएका थिए।
१६ वटा मूर्ति सकुशल रहे पनि आगलागीबाट क्याथेड्रलको शिखर र छाना भत्किएर भुँइमा झरेको छ। अरू धेरै क्षति भएको छ जसको विस्तृत विवरण आइसकेको छैन। फ्रान्सेली संस्कृति र इतिहासको धरोहरको रुपमा रहेको अमूल्य सम्पदामा जिर्णोद्धारकै कामका कारण आगो लागेको हुनसक्ने अनुमान गरिएको छ।
फ्रान्सेली राष्ट्रपतिले चर्च पाँच वर्षमा पुनर्निर्माण गरिसक्ने बताए पनि विज्ञहरूले भने दस वर्षभन्दा बढी लाग्ने बताएका छन्।