नेपाल पत्रकार महासंघका कास्की शाखा सदस्य तथा ताण्डब न्यूजडटकम र ताण्डव साप्ताहिकका सम्पादकसमेत रहेका गिरीलाई ठगीको समाचार लेखेको विषयलाई लिएर स्थानीय विपेन्द्रराज बतासले दिएको जाहेरीका आधारमा कास्की प्रहरीले पोखराबाट पक्राउ गरेको थियो।
नेपाल पत्रकार महासंघका सचिव रामप्रसाद दाहालका अनुसार गिरीलाई भोलि पुनः हाजिर गर्ने गरी रिहा गरिएको जानकारी दिए।
गिरीलाई साइबर क्राईम अन्तर्गत पक्राउ गरिएपछि नेपाल पत्रकार महासंघलगायत विभिन्न संघ संस्थाले विरोध गरेका थिए।
समाचारको बिषयलाई लिएर चित्त नबुझेमा नियमनकारी निकाय प्रेस काउन्सिलमा उजुरी गर्ने प्राबधानलाई लत्याउँदै पत्रकारमाथि विद्युतीय कारोबार ऐनमा कारबाही चलाउनु आपत्तिजनक रहेको भन्दै गिरीलाई तत्काल रिहा नगरिए आन्दोलन गर्ने महासंघले चेतावनीसमेत दिएको थियो।
सिआइबीका प्रमुख डिआइजी निरज शाहीले पत्रिका दर्ता नगरी आफूविरुद्ध समाचार लेखेको उजुरीका आधारमा गिरीलाई पक्राउ गरिएको बताए।
गिरीले ताण्डवको चैत २२ गतेको अंकमा ‘ठग! बदमास वीपेन्द्रराज बतास’ शीर्षकको समाचार लेखेका थिए। सोही समाचार ताण्डवन्युज डटकममा प्रकाशित भएको थियो।
समाचारमा बतासले पोखराका व्यवसायी मनोज श्रेष्ठ र जनकराज पहारीलाई क्रमश: १ करोड ९८ लाख र २ करोड २५ लाख गरी ४ करोड २३ लाख ठगेको उल्लेख छ।
श्रेष्ठ र पहारीले बतासबाट आफ्नो पैसा उठाइदिन आग्रह गर्दै जिल्ला प्रहरी कार्यालय कास्कीमा निवेदन दिएको कुरालाई समाचारको आधार बनाइएको छ।
समाचार लेखेकै आधारमा प्रहरीले गिरीलाई साइबर क्राइम अन्तर्गत मुद्दा दर्ता गर्नु आपत्तिजनक भएको नेपाल पत्रकार महासंघ कास्कीका अध्यक्ष दीपेन्द्र श्रेष्ठले उल्लेख गरेका छन्।
‘समाचारको बिषयलाई लिएर चित्त नबुझेमा नियमनकारी निकाय प्रेस काउन्सिलमा उजुरी गर्ने र आवश्यक परे कारवाही गर्ने प्रावधान हुँदाहुँदै पत्रकारमाथि साइबर क्राइमको मुद्दा दायर गरि कारबाही गर्ने प्रवृत्तिको महासंघ कास्की खेद प्रकट गर्दै पक्राउ परेका पत्रकार गिरीको अविलम्ब रिहाइको माग गर्दछ,’ अध्यक्ष श्रेष्ठले फेसबुकमा लेखेका छन्।
