काठमाडौंको सडक धूलोमुक्त बनाउन मंगलबारदेखि काठमाडौं महानगरपालिकाले पाँच वटा ब्रुमर सञ्चालनमा ल्याएको छ।
काठमाडौं महानगरपालिकाका मेयर विद्यासुन्दर शाक्यले मंगलबार काठमाडौंमा एक कार्यक्रमको आयोजना गरी काठमाडौंको सडक धूलोमुक्त बनाउन इटालीबाट खरिद गरिएको नयाँ प्रविधिको ५ वटा ब्रुमर सञ्चालन कार्यको शुभारम्भ गरेका हुन्।
कार्यक्रममा बोल्दै उनले काठमाडौंको सडकलाई धूलोमुक्त बनाउन सबैलाई साथ र सहयोग गर्न पनि अपिल गरे।
मेयर शाक्यले काठमाडौंको सडक धूलो र हिलोमुक्त बनाउन सडक विभाग, मेलम्ची खानेपानी आयोजना, काठमाडौं उपत्यका खानेपानी लिमिटेड र वडा कार्यालयहरूसँग सहकार्य गरेर अघि बढ्ने निर्णय गरिएको पनि जानकारी दिए।
१ सय ७ किलोवाट क्षमता रहेको सो ब्रुमर ७ लाख ६२ हजार ४ सय ७० युरोमा इटालीबाट खरिद गरिएको हो। त्यसमा रहेको ४ वटा ब्रसले सडकको धूलोलाई सफा गर्नेछ। ती पाँच वटा ब्रुमर तत्कालका लागि रातिको समयमा ८ घण्टा सञ्चालन गरिने छ।
काठमाडौंको टेकुबाट ब्रुमर सञ्चालन हुने रूटहरू :
- रूट नम्बर १ : टेकुबाट सुरू हुँदै सोल्टीमोड, टेकु, त्रिपुरेश्वर, सुन्धरा, नयाँ सडक, महांकाल, जमल, लाजिम्पाट, शितल निवास, शिक्षण अस्पताल, महाराजगञ्ज हुँदै जमल, घण्टाघर भद्रकाली हुँदै सुन्धारासम्म
- रूट नम्बर २ : टेकुबाट सिंहदरबार, पुतलीसडक, कमलादी, बालुवाटारलगायतका स्थानमा
- रूट नम्बर ३ : टेकुबाट कमल पोखरी, ज्ञानेश्वर, मैतीदेवी, पुरानो बानेश्वर, गोशाला, एयरपोर्ट, सिनामंगल, चाबहिलसम्म
- रूट नम्बर ४ : गौशला, बत्तिसपुतली, पुरानो बानेश्वर, मैतीदेवीलगायतका स्थानमा
- रूट नम्बर ५ : टेकुबाट कलंकी, सितापाइला, बालाजु, ठमेललगायतका स्थानमा