प्रदेश दुईका मुख्यमन्त्री लालबाबु राउतले क्षयरोगलाई प्रदेश दुईमा निर्मुल पार्नका लागि सरकार गम्भीर रहेको बताएका छन्।
प्रदेश दुईमा क्षयरोगी सबभन्दा बढी रहेकाले यसलाई नियन्त्रण गर्नका लागि सरकार गम्भिरताका साथ अगाडि बढिरहेको बताए।
प्रदेश दुईका लागि क्षयरोग पनि अभिशाप जस्तै रहेकाले यसलाई समाप्त पार्न प्रदेश सरकार हरसम्भव प्रयास उनले प्रतिवद्धता व्यक्त गरे।
१३६ औं विश्व क्षयरोग दिवस तथा सार्क क्षयरोग दिवसको अवसरमा आयोजित अन्तरक्रिया कार्यक्रमलाई सम्बोधन गर्दै मुख्यमन्त्री राउतले विगतमा क्षयरोग नियन्त्रणका लागि सरकारले गरेको लगानी अनुरूप प्रतिफल प्राप्त हुन नसकेको भए पनि अगामी दिनमा त्यो समस्या आउन नदिने दाबी गरे।
उनले प्रदेशमा व्याप्त अशिक्षा र खुला सीमानाका कारण स्वास्थ्यमा सोचे अनुरूपको प्रगति हुन नसकेको स्वीकार गर्दै आउने दिनमा क्षयरोग जस्ता रोगहरूको नियन्त्रण तथा उन्मुलनका लागि प्रदेश सरकार सतर्कताका साथ अगाडि बढ्ने प्रतिवद्धता व्यक्त गरे।
पछिल्ला एक दशक जनप्रतिनिधिविहीन रहेका कारण समेत अनुगमन निरीक्षण हुन नसक्दा कार्यक्रमहरू प्रभावकारी हुन नसकेकोले अबको दिनमा नियमित अनुगमन निरीक्षण गर्दै क्षयरोग नियन्त्रणको लागि कडाइका साथ सरकार प्रस्तुत हुने बताए।
मुख्यमन्त्री राउतले हालको संक्रमणकालीन अवस्था लामो समय नरहने जिकिर गर्दै स्वास्थ्य क्षेत्रमा देखिएका कर्मचारी अभाव जस्ता समस्या केही दिनभित्रै समाधान हुने बताए।