प्रहरी टोली र विप्लव समूहबीच काभ्रेमा दोहोरो फायरिङ भएको स्रोतले बताएको छ। विप्लव माओवादीका नेता-कार्यकर्ता पक्रन गएको महानगरीय प्रहरी अपराध महाशाखाको टोली र विप्लव माओवादी दुबैतर्फबाट दोहोरो फायरिङ भएको प्रहरी स्रोतले बतायो।
यद्यपि, प्रहरीले घटनाबारे स्वतन्त्र पुष्टि गरेको छैन। ‘हाम्रो टोली विप्लव नेता-कार्यकर्ता पक्रन गएको हो, यसक्रममा गोली चलेको हल्ला छ तर टोलीसँग मेरो सम्पर्क हुन सकेको छैन,’ अपराध महाशाखाका प्रहरी उपरीक्षक केदार ढकालले भने।
फायरिङ भएको क्षेत्र रोशी गाउँपालिका-२ फलामेसाँघु पर्छ। ललितपुर नख्खुमा गराएको बम बिस्फोट घटनामा संलग्न व्यक्तिहरू त्यहाँ रहेको जानकारी पाएपछि प्रहरी टोली परिचालन भएको थियो। महाशाखाका एसपी सोमेन्द्रसिंह राठौरको नेतृत्वमा झन्डै बीस जनाको टोली मंगलबार साँझ त्यहाँ गएको थियो।
‘बम बिस्फोट गराउने समूहसहित विप्लव माओवादीको सेल्टर रहेको जानकारी आएपछि प्रहरी गएको थियो,’ प्रहरी स्रोतले भन्यो, ‘पक्राउ गर्ने क्रममा दुबैतर्फ गोली चलेको कुरा छ।’
फायरिङ क्रममा क्रममा विप्लव समूहका दुई जना व्यक्तिलाई पक्राउ गरिएको अनौपचारिक जानकारी आएको छ।
