दाङको तुलसीपुर उपमहानगरपालिकाले विकट वडाका जनतालाई सेवा दिने उद्धेश्यका साथ एम्बुलेन्स सञ्चालनमा ल्याएको छ।
नगरका १९ वटै वडाहरूमा एम्बुलेन्स सञ्चालन गर्ने लक्ष्य राखेको तुलसीपुरले पहिलो चरणमा ३ वटा वडाहरूमा एम्बुलेन्स सञ्चालनमा ल्याएको छ।
मेयर घनश्याम पाण्डेले वडा नं १, १३ र १९ मा पहिलो चरणमा एम्बुलेन्स सञ्चालनमा ल्याइएको जानकारी दिए।
शुक्रबार ५ नं प्रदेशका मुख्यमन्त्री शंकर पोख्रेल,नगर प्रमुख घनश्याम पाण्डेले वडा नम्बर १ का वडा अध्यक्ष लक्ष्मण भण्डारीलाई एम्बुलेन्सको साँचो हस्तान्तरण गर्दै एम्वुलेन्स सेवा सुरू गरेका थिए।
स्वास्थ्य महाशाखा प्रमुख डा. गोकर्ण दाहालले निकट भविष्यमै उपमहानगरपालिकाका ८ वटा स्वास्थ्य चौकीहरूमा एम्बुलेन्स सेवा सञ्चालनका लागि पहल भइरहेको बताएका छन्।
नगरका विकट मानिने वडाहरू ४,७,११,१५ र १७ मा पनि एम्बुलेन्स सञ्चालनका लागि पहल भइरहेको दाहालले जानकारी दिए। उपमहानगरपालिकाले सञ्चालन गरेका एम्बुलेन्सहरूमा सुत्केरी महिला र ज्येष्ठ नागरिकहरूलाई ५० प्रतिशतसम्म छुटको व्यवस्था गरिएको स्वास्थ्य महाशाखाका उपसंयोजक वसन्त आचार्यले बताए। एम्वुलेन्सहरूको सञ्चालन वडामा रहेको स्वास्थ्य चौकी व्यवस्थापन समितिले गर्ने गरी अख्तियारी दिइएको छ।