प्रधानमन्त्री केपी शर्मा ओलीले दार्चुलाको राताकाठामा शुक्रबार साँझ भएको जीप दुर्घटनामा परी निधन भएकाहरूलाई श्रद्धाञ्जली दिएका छन्।
जीप दुर्घटना हुँदा एक जना बालिकासहित ११ जनाको निधन भएको थियो। घाइते जीप चालकको शीघ्र स्वास्थ्य लाभको कामना गरेका प्रधानमन्त्रीले दुर्घटनामा निधन भएकाहरूको परिवारजन र आफन्तहरूमा गहिरो समवेदना व्यक्त गरेका छन्।
खलङ्गाबाट दुहुँ गाउँपालिकाको हिकिला गइरहेको म१ज २८० नंको जिप दुर्घटनामा परेको थियो। सशस्त्र प्रहरी नायब उपरीक्षक भीमबहादुर चन्दका अनुसार दुहुँ गाउँपालिका–१ का ५३ वर्षीया मानमती भट्ट, ४५ वर्षीया गौमती बम, ७१ वर्षीया धानाम बम, २४ वर्षीय धनबहादुर बम,वडा नं २ का ४१ वर्षीय कल्यानसिंह बडाल र उनका १७ वर्षीया छोरी निर्मला (निरु) बडाल, सोही ठाउँका ३५ वर्षीया परुली धामीको निधन भएको छ।
साथै दुहुँ गाउँपालिका–४ का ५५ वर्षीया अमरा बम, सात वर्षीया आयुषा बम तथा बुहारीलाई माइती घर पुर्याउन आएका बैतडी जिल्ला दोगडाकेदार गाउँपालिका–६ का ६० वर्षीय प्रताप भनिने धनबहादुर चन्द र २१ वर्षीया स्नेहा बम चन्द रहेको जिल्ला प्रहरी कार्यालय दार्चुलाका प्रहरी निरीक्षक रवीन्द्र कठायतले बताए।
चालक दीपकसिंह धामी गम्भीर घाइते भएपछि उपचारको लागि भारत पिथौरागढ सिफारिस गरिएको छ। उनको टाउको र खुट्टामा चोट लागेको स्वास्थ्य सहायक डम्मरदत्त भट्टले बताए। चार दिनअघि सोही क्षेत्रमा पहिरोमा परी एकको मृत्यु भएको थियो । पहिरो गएको क्षेत्रमै जिप दुर्घटना भएको हो। जिप झण्डै ५०० मिटर तल महाकाली नदीमा खसेको थियो ।
