चन्द्रागिरी नगरपालिकाको मच्छेगाउँ ९ मा राँगोको आक्रमणमा परी एक जनाको मृत्यु भएको छ। राँगोको आक्रमणबाट शनिबार बिहान स्थानीय ७० वर्षीय मानवीर महर्जनको मृत्यु भएको डिएसपी कुमार विक्रम थापाले जानकारी दिए।
मर्निङ वाकमा निस्किएका महर्जनलाई राँगोले आक्रमण गरेको थियो। गम्भीर घाइते महर्जनलाई उपचार गर्न कीर्तिपुर अस्पताल लैजाँदै गर्दा बाटोमै मृत्यु भएको प्रहरीले जनाएको छ।
आक्रमण गर्ने राँगो दहचोक पुगेपछि प्रहरीले लखेटेर गोली हानेर मारेको छ।
राँगोले मान्छे मारेपछि महानगरीय प्रहरी वृत्त थानकोट र महानगरी प्रहरी प्रभाग वलम्वुको टोली र स्थानीयबासीले राँगोलाई समात्ने प्रयास गरेका थिए।
मच्छेगाउँबाट खेद्दै दहचोक पुगेपछि प्रहरीले राँगोमाथि गोली चलाएको थियो। थप क्षति हुनबाट जोगाउन गोली चलाएको प्रहरील वृत्तका प्रमुख प्रहरी नायव उपरीक्षक थापाले बताए।
राँगोको आक्रमणबाट केही घाइते समेत भएको बुझिएको छ। राँगोलाई नियन्त्रणमा लिन खोज्दा महानगरीय प्रहरी प्रभाग बलम्वुका प्रहरी हवल्दार लालबहादुर राना सामान्य घाइते भएका हुन्।
