एक किशोरीमाथि बाटोमा हिँडिरहेको बेला यौनदुर्व्यवहार गरेको आरोपमा त्रिभुवन विश्वविद्यालय शिक्षा शास्त्र संकायका सहायक डिन बौवालाल साहलाई प्रहरीले हिरासतमा लिएको छ।
बुधबार बिहान मामाको ट्रान्सक्रिप्ट निकाल्न त्रिवि पुगेकी एक १६ वर्षीया किशोरीमाथि बलात्कार गर्न खोजेको भन्दै विद्यार्थीहरूले साहमाथि आक्रमण गर्न खोजेका थिए।
‘टियूको नेपाल बैंक लिमिटेडबाट बल्खुको परीक्षा नियन्त्रण कार्यालय जाने छोटो बाटोमा मोटरसाइकलमा आएका साहले बलात्कार गर्न खोजे। जबरजस्ती संवेदनशील अंगमा समाए भनेर किशोरी प्रहरी कार्यालयमा आउनुभयो,’ कीर्तिपुर वृत्तका प्रहरी प्रमुख अनिल खड्काले सेतोपाटीसँग भने, ‘तर उहाँले उजुरी दिनुभएको छैन। अभिभावक आएपछि उजुरी दिने भन्नुभएको छ।’
किशोरी प्रहरी कार्यालय पुगेपछि विद्यार्थीहरूले सहायक डिन साहविरूद्ध नाराबाजी गरेका थिए। उनीमाथि आक्रमण हुन सक्ने भएपछि प्रहरीले उद्धार गरेको थियो।
‘अहिले उहाँलाई कालीमाटी वृत्तमा राखिएको छ,’ डिएसपी खड्काले भने, ‘किशोरीले उजुरी नदिए पनि हामी दुबै जनाको मेडिकल गर्दैछौं।’
ती किशोरीले प्रहरीलाई बाटोम हिँडिरहेको बेला मोटरसाइकलमा आएका साहले आफूलाई जबरजस्ती गर्न खोजेको बताएकी छन्। साहले भने उनको आरोप अस्वीकार गरेका छन्।