भूकम्पले क्षतिग्रस्त ललितपुरको पाटन दरबार क्षेत्रमा रहेको भिमसेन मन्दिरको पुनर्निर्माणको काम सुरू गरिएको छ।
भूकम्पले क्षति पुर्याएको ३ वर्ष ९ महिना बित्दा पनि सरकारले सो मन्दिरको पुनर्निर्माणको काम सुरू नगरेपछि ललितपुर उद्योग वाणिज्य संघको अगुवाइमा सोमबारबाट पुनर्निर्माणको काम सुरू गरिएको हो।
ललितपुर महानगरपालिकाका मेयर चिरिबाबु महर्जनले सो मन्दिरको पुनर्निर्माणको कामको सुरूआत गर्दै आवश्यक सबै खालको सहयोग उपलब्ध गराउने प्रतिवद्धता व्यक्त गरे। उक्त मन्दिरको पुनर्निर्माण नेपाल सरकारको आग्रहमा भारतीय दूतावासले गर्ने योजना तय गरिएको थियो। तर भारतीय दूतावासले सो काम अघि नबढाएपछि स्थानीयवासी आफैं सो मन्दिर बनाउन अग्रसर भएका हुन्।
सो मन्दिरको पुनर्निर्माणका लागि ललितपुर उद्योग वाणिज्य संघले ‘आफ्नो सम्पदा आफैं निर्माण गरौं’ भन्ने अभियान नै सञ्चालन गरेको छ।
स्थानीय जनताको सहयोगमा सो मन्दिर पुनर्निर्माण कार्य सुरू गरिएको संघका अध्यक्ष एवम् मन्दिर पुनर्निर्माण सरोकार समितिका संयोजक कृष्णलाल महर्जनले जानकारी दिए।
संघले मन्दिर पुनर्निर्माणका लागि १० लाख नगद हस्तान्तरण गरिसकेको छ। अब स्थानीय व्यापारीहरूसँग चन्दा, दान संकलन गरेर भए पनि सो मन्दिर पुनर्निर्माणको काम सम्पन्न गर्ने पनि संघका अध्यक्ष महर्जनले बताए।
२ वर्षभित्र सम्पन्न गरिसक्ने लक्ष्य लिइएको सो मन्दिर पुनर्निर्माणका लागि करिब ५ करोड लाग्ने अनुमान गरिएको छ।